BARAZA LA MADIWANI LAPITISHA RASIMU YA MPANGO NA BAJETI 2024/2025

Posted on: February 2nd, 2024

Na: Sweetbetter Njige -TMC Habari

Baraza la madiwani manispaa ya Temeke likiongozwa na Mstahiki meya Mhe.Abdallah Mtinika limeidhinisha Bilioni 152.6 ikiwa ni rasimu ya mpango na bajeti kwa mwaka wa fedha 2024/2025 ambapo kati ya hizo Bilioni 99.6 ni ruzuku kutoka serikali kuu na Bilioni 53 ni mapato ya ndani. Huku Bilioni 27.5 kutoka katika mapato ya ndani zikitarajiwa kwenda kutekeleza miradi mbalimbali ya maendeleo katika manispaa hii.

Akizungumza wakati wa baraza hilo lililofanyika leo Februari 1,2024 Mhe. Mtinika amesema ni furaha kwa baraza la Madiwani na Watumishi kwa ujumla kuendelea kushuhudia ukuaji katika ukusanyaji wa mapato na mafanikio ya utekelezaji wa miradi mbalimbali ya maendeleo na Manispaa hiyo imejipanga kuyafikia makadirio hayo kwa kutumia mbinu mbalimbali.

"Ukusanyaji wa mapato unaendele kukua, bajeti yetu imeendelea kuongezeka mwaka hadi mwaka, tumeweka mipango mingi katika kuimarisha uwekezaji, kuongeza vyanzo vipya vya mapato, mbinu mpya za ukusanyaji  na kuboresha mazingira ya biashara".Alisema Meya huyo

Kwa upande wake mkurugenzi wa manispaa ya Temeke Ndg.Elihuruma Mabelya amesema Menejimenti imefanya maandalizi ya kutosha kwa kushirikiana na madiwani na wamebainisha vipaumbele vya maeneo yanayohitaji utekelezaji wa kibajeti.

Nae Mchumi wa manispaa Ndg. Gervas Lupembe amesema kuwa kwa mwaka wa fedha 2023/2024 Manispaa kupitia mapato yake ya ndani imefanikiwa kutekeleza miradi mbalimbali ya maendeleo katika sekta ya afya, elimu n.k huku ikijipanga kukusanya Bilioni 53 kwa mwaka wa fedha 2024/2025 kutoka katika vyanzo vyake mbalimbali vya mapato ya ndani.

Serikali hupanga bajeti mapema kwa kila mwaka mpya wa fedha ili kuweza kufikia malengo iliyojiwekea kwa kuzingatia vyanzo vya mapato na matumizi.