CHANJO KUTOLEWA JUMAPILI UWANJA WA UHURU

Posted on: August 19th, 2021

Mkuu wa mkoa wa Dar es Salaam Mheshimiwa Amos Makalla ameongea na waandishi wa habari leo Agosti 19,2021 katika ukumbi wa Iddi Nyundo uliopo katika halmashauri ya manispaa ya Temeke juu ya upatikanaji wa chanjo ya ugonjwa wa Virusi vya Korona ( UVIKO 19).

Akizungumza wakati wa mkutano huo,Mhe. Makalla amemuagiza Mganga mkuu wa Mkoa(RMO) kuhakikisha Chanjo hiyo inatolewa kwa Wananchi wote wanaotaka kuchanjwa kwa hiari kila siku ya Jumapili katika uwanja wa Uhuru, kuanzia saa 2 asubuhi mpaka saa 10 jioni.

"Pamoja na kwamba tuna vituo vingi vya kutolea chanjo, naelekeza kuwepo na zoezi la wazi la watu wote wa mkoa wa Dar es Salaam kila siku ya Jumapili, kwenye uwanja wa Uhuru, kuanzia saa 2 mpaka saa 10 jioni kwa watu wa umri kuanzia miaka 18 na kuendelea" Alisisitiza Mhe.Makalla.

Aidha Mhe. Mkuu wa Mkoa amewakumbusha Wananchi kuendelea kujikinga pamoja na kwenda kupata Chanjo kwa hiari na kuwa Chanjo hiyo inapatikana bure.

Watendaji wakuu wa mkoa wa Dar es Salaam wameendelea kuwa mstari wa mbele kupambana na UVIKO 19 kwa kuhakikisha wananchi wanajikinga,na kupata Chanjo kwa hiari ili kutokomeza ugonjwa huo pamoja na kuendelea kupanua wigo wa upatikanaji wa huduma ya Chanjo.