CHAUREMBO AANZA UJENZI WA KIVUKO FEDERATION-KISIWANI

Posted on: March 6th, 2022

Mbunge wa Jimbo la Mbagala Mheshimiwa Abdallah Chaurembo ameanza ujenzi wa kivuko cha waenda kwa miguu, pikipiki, bajaji na gari ndogo katika eneo la Machimbo Mtaa wa Msufini Kata ya Chamazi.

Ujenzi wa kivuko hiko kinachotenganisha eneo la Federation na Kisiwani na kushirikisha nguvu ya pamoja ya Mheshimiwa Chaurembo na Wananchi wa eneo hilo umeanza leo Jumapili 6 Machi 2022.

Katika ujenzi huo  Mheshimiwa Chaurembo aliambatana na  viongozi wa Chama Cha Mapinduzi (CCM) Kata ya Chamazi wakiongozwa ba  Mwenyekiti Ndg. Salehe Chautundu na Katibu Ndg. Ally Singilimo sambamba Mwenyekiti wa Serikali ya Mtaa wa Msufini Ndg. Salum Msoma.

Wakizungumza kwa wakati tofauti Wananchi wa eneo hilo wamemshukuru Mheshimiwa Chaurembo kwa kuanza ukarabati wa kivuko hiko kilichokuwa kero kwa wakazi hao kwa miaka mingi.

Ujenzi wa kivuko hiko umekuja baada ya Mheshimiwa Chaurembo kufanya Mkutano wa hadhara katika eneo hilo na kupata kero mbili za kukosekana miundombinu ya umeme na ukosefu wa kivuko cha kudumu.

Kero ya kukosekana kwa miundombinu ya umeme Mheshimiwa Chaurembo ameshaitatua ambapo kwa sasa  unapatikana na ameanza kutatua kero ya pili ya kivuko.