DC Gondwe akabidhiwa kijiti cha kuongoza Wilaya ya Temeke

Posted on: July 9th, 2020

MHE.GODWIN GONDWE AKABIDHIWA RASMI KIJITI CHA KUONGOZA WILAYA YA TEMEKE NA MTANGULIZI WAKE

Aliyekuwa Mkuu wa wilaya ya Temeke Mhe Felix Lyaniva amemkabidhi rasmi Mhe.Godwin Gondwe kijiti cha kuongoza Wilaya ya Temeke.

Tukio hilo limefanyika leo katika ukumbi wa Iddy Nyundo ulioko makao makuu ya Manispaa ya Temeke Jijini Dar es Salaam, na kuhudhuriwa na kamati ya ulinzi na usalama pamoja na watumishi wa Manispaa hiyo.

Aliyekuwa mkuu wa Wilaya ya Temeke Mhe Felix Lyaniva wa kwanza (kulia) akimkabidhi nyaraka muhimu DC mpya Mhe Godwin Gondwe katika ukumbi wa Iddy Nyundo.

Mhe Godwin Gondwe anachukua nafasi ya Felix Lyaniva ambaye kwa sasa amestaafu kwa mujibu wa sheria ya utumishi wa Umma.

Akiongea wakati wa makabidhiano hayo Mhe Gondwe amehaidi kuendeleza yale yote ambayo mtangulizi wake aliyasimamia kwa weledi mfano ukusanyaji wa mapato na utekelezaji wa miradi mbalimbali ya mendeleo katika wilaya ya Temeke.

Mkuu wa wilaya mpya wa Temeke Mhe Godwin Gondwe akiongea na watumishi mara baada ya kukabidhiwa ofisi rasmi.

Pia amesema anatambua kuwa ili maendeleo yaweze kupatikana ni lazima pawepo na mahusiano mazuri baina ya viongozi wakuu kwa maana ya ofisi ya mkuu wa wilaya na ofisi ya Mkurugenzi wa Manispaa bila kusahau watumishi kwa ujumla hivyo haina budi kwake kusimamia hilo ili Temeke isonge mbele zaidi.

Kwa upande wa aliyekuwa Mkuu wa Wilaya Mhe Felix Lyaniva amemkabidhi nyaraka muhimu Mhe Gondwe ikiwemo kitabu cha utekelezaji wa Ilani, kitabu cha namna Wilaya ilivyotekeleza utoaji wa mikopo ya 10% kwa mafanikio makubwa na akamuhaidi kuendelea kumpa ushirikiano wakati wowote utakapo hitajika.

Aidha kwa niaba ya watumishi wote wa Manispaa Mkurugenzi wa Manispaa ya Temeke Ndg Lusubilo Mwakabibi amemhakikishia mkuu huyo mpya Mhe Godwin Gondwe kuwa watumishi wa Manispaa wako tayari kuchapa kazi na kumpatia ushirikiano wa hali ya juu kwa ajili ya ustawi na maendeleo ya Wanatemeke na Taifa kwa ujumla.