DC GONDWE MGUU KWA MGUU NA WADAU WA NMB.

Posted on: June 3rd, 2021

DC GONDWE MGUU KWA MGUU NA WADAU  BENKI YA NMB.

Mkuu wa Wilaya ya Temeke Mhe Godwin Gondwe leo amefanya ziara na wadau kutoka Benki ya NMB (NMB BANK PLC) kutembelea Shule za Msingi na Sekondari zilizoko katika Wilaya ya Temeke, Dar es Salaam.

Mhe Mkuu wa Wilaya mbali na kuambatana na wadau kutoka NMB pia aliambatana na wataalamu wa Manispaa  ambao ni wakuu wa Idara na Vitengo.

Katika ziara hiyo Mkuu wa Wilaya amezuru shule nne (4) ambazo ni Shule ya Sekondari Mbande, Charambe na Shule ya msingi Maji matitu na Mbande akiwa na wadau kutoka NMB kwa lengo la kujionea changamoto mbalimbali zilizoko ili ziweze kutatuliwa.

Mh Gondwe amesema Serikali ya wilaya imekuwa ikijitahidi kuhakikisha inaboresha miundombinu ya elimu kwa kuhakikisha  kunakuwa na mazingira bora ya kutoa elimu katika ngazi ya msingi na Sekondari.

"Nafarijika sana kuambatana na Benki ya NMB  katika ziara hii kujionea changamoto zinazoikabili sekta ya elimu hususani katika Wilaya ya Temeke, naamini baada ya ziara hii watatusaidia kwa namna moja au nyingine kupunguza changamoto zilizoko ili kuunga mkono juhudi kubwa inayofanywa na Manispaa" Alisema Mhe Gondwe.

Kwa upande wa Benki ya NMB kupitia Meneja Mahusiano NMB na Serikali kwa kanda ya Dar es Salaam  Bi Irene Masaki amesema ziara hiyo imewafungua macho wamejionea changamoto anuai kama msongamano wa wanafunzi, uhaba wa madarasa na madawati, uhaba wa matundu ya vyoo, majengo chakavu, kutokutosheleza kwa samani nk,

Hivyo vyote wataenda kuwasilisha makao makuu ya Benki ya NMB na wanaamini ziko baadhi ya changamoto zitatatuliwa mapema iwezekanavyo kwa kuwa Benki hiyo hutenga asilimia moja (1%) ya faida baada inayopatikana na huwa na utaratibu wa kurejesha kwa jamii.

Vilevile aliahidi kuendeleza utamaduni wa kuzitembelea shule ili kuwajengea vijana ufahamu wa umuhimu wa kuwa na akaunti ili kutunza pesa na badae kutimiza ndoto zao.

Sambamba na hayo Mhe Mkuu wa Wilaya alipata wasaa wa kuongea na wanafunzi na kuwataka vijana kusoma kwa bidii, kuwa na nidhamu na kujiwekea malengo katika maisha yao kuanzia sasa.

Akasisitiza kwa msemo wa "Binti shujaa...natimiza ndoto yangu" akawataka vijana wakike kutokushawishika na kitu chochote badala yake wasome kwa bidii pia vijana wakiume watumie fursa waliyoipata kusoma kwa kuwa ndio njia pekee ya kujikwamua dhidi ya umasikini.

Akahitimisha kwa kusema Serikali ya awamu ya sita chini ya Mhe Rais Samia Suluhu Hassan imejidhatiti kuwapatia elimu bora vijana wa kitanzania na yeye akiwa mwakilishi wake ndani ya wilaya ya Temeke atafanya kazi usiku na mchana kwa kushirikiana na wataalam ili kutimiza malengo hayo.