DC JOKATE AENDELEA KUTATUA KERO YA MAJI MASHULENI.

Posted on: February 17th, 2022

TUTAENDELEA KUTATUA KERO YA MAJI MASHULENI - DC TEMEKE

Mkuu wa wilaya ya Temeke Mheshimiwa Jokate Mwegelo amesema changamoto za upatikanaji wa matundu ya vyoo, maji safi na salama katika shule za sekondari zitaendelea kutatuliwa ili kuwanufaisha wanafunzi na walimu wilayani Temeke.

Ameyasema hayo siku ya Februari 10, 2022 katika hafla fupi ya uzinduzi rasmi wa visima viwili vya maji iliyofanyika katika Shule ya Sekondari Mbagala iliyopo kata ya Mbagala kuu pamoja na Dovya iliyopo kata ya Chamazi Wilaya ya Temeke.

Aidha Mhe. Jokate amemshukuru mwakilishi kutoka shirika la Hayrat Yardim Ndugu Yusuf Kara ambao wamefadhili uchimbaji na ujenzi wa visima hivyo huku akiendelea kuwaomba kutokuishia hapo na kuwataka waendelee kusaidia shule nyingine ili kuimarisha miundombinu ya elimu kwa kumuunga mkono Mhe. Rais Samia Suluhu Hassan kwa vitendo.

"Lazima miundombinu yetu yote iendane na uchumi wa hadhi ya mkoa wetu, wilaya yetu na kata zetu naamini tukiendelea kuweka jitihada  mahsusi tutafanikiwa na watoto wetu watakuwa na mazingira bora ya kujifunza, lakini pia walimu wetu watakuwa na mazingira mazuri ya kuwafundisha wanafunzi wetu". Alisema Mhe. Jokate

Pia katika kuhakikisha anaongeza ufaulu wilaya ya Temeke Mhe. Jokate amesema wamejipanga kuunda kamati maalumu kwa kushirikiana na Chuo Kikuu cha Elimu Dar es salaam (DUCE) ili kusaidiana katika kukabiliana na changamoto za elimu pamoja na kuongeza uwezo wa walimu kufundisha vizuri.

Naye mwakilishi kutoka Uturuki wa Shirika la Hayrat Yardim Ndugu Yusuf amesema anaamini mchango huu wa visima utasaidia kurahisha upatikanaji wa maji safi na salama kwa wanafunzi wa shule hizo huku akiahidi kuchangia viti na meza 50 shule ya Sekondari Mbagala na kuendelea kujenga visima vingine ili kuisaidia jamii kutatua kero ya maji.

Sambamba na hayo Mhe. Jokate ameipongeza Shule ya Sekondari Mbagala kwa kufanya vizuri matokeo ya kidato cha 2 na 4 wilayani humo huku akiendelea kuhimiza walimu, jamii, viongozi na wadau mbalimbali wa maendeleo kushirikiana kuijenga jamii iliyobora kupitia elimu katika mazingira mazuri.