DC JOKATE AWATANGAZIA NEEMAWAKAZI WA CHAMAZI

Posted on: June 25th, 2022

Na Sweetbetter Njige TMC Habari.

Juni 24,2022 mkuu wa wilaya ya Temeke mheshimiwa Jokate Mwegelo amefanya ziara  katika kata ya Chamazi, mtaa wa Mbande Magengeni, kwa lengo la kusikiliza kero za Wananchi na kuzipatia ufumbuzi.

Katika ziara hiyo Mhe. Jokate aliambatana na mkurugenzi wa manispaa ndugu Elihuruma Mabelya, diwani wa kata ya Chamazi  Mhe. John Laurent Gama, wakuu wa idara za manispaa ya Temeke na wakuu wa  taasisi mbalimbali za Umma wakiwemo wa  TANESCO,NSSF, Jeshi la Uhamiaji na TARURA   ambapo Wananchi walipata wasaa wa kueleza kero zao na kupata majibu ya kero hizo moja kwa moja.

Wakati wa hotuba yake Mhe. Jokate aliwashukuru Wananchi kwa kujitokeza kwa wingi na kutoa kero zao, njia ambayo itasaidia kuboresha hali ya mazingira ya upatikanaji na utoaji huduma.

"Changamoto hazikosekani kwenye njia ya kuyafikia maendeleo, nampongeza Mhe. Diwani kwa maendeleo anayopata katika kata, shule mpya yenye jumla ya vyumba 20 imejengwa kwa nguvu za Rais wetu Samia Suluhu Hassan.

Kupitia ruzuku na mapato ya ndani Mkurugenzi amefanikiwa kutoa milioni 470 kwa ajili ya  ujenzi wa shule ya msingi Dovya  kupunguza mzigo kwenye shule nyingine, na kituo chetu cha polisi kinaenda kumalizika hivyo tutaimarisha ulinzi,tunatarajia miradi mingi zaidi katika kata hii kama vile kituo cha afya mtaa wa Mkondogwa kinachojengwa kwa milioni 500,TARURA wana mpango wa kujenga barabara za mitaa kwenye kata hii,hivyo tutafanikiwa kupunguza ama kuondoa kabisa kero zilizosemwa hapa kwa kiasi kikubwa"

Akizungumza kwa niaba ya Wananchi  Mhe. Gama ametoa shukrani za dhati na kumpongeza Mhe. Jokate kwa kuamua kuwafikia kujua hali halisi ya changamoto na kero za Wananchi na kuzitolea ufumbuzi.

Kwa upande wake mkurugenzi Mabelya amesema kwamba

Manispaa imejipanga ipasavyo kuwahudumia Wananchi, na kwamba wasiwe na hofu kwani katika mwaka wa fedha ujao (2022/2023) wamejipanga kuboresha na kukarabati masoko na huduma nyingine mbalimbali ili wakusanye mapato huku Wananchi wakifurahia huduma.

 Aidha ametoa wito kwa Watendaji kutoa huduma katika namna bora ili kupunguza kero ndogo ndogo kwa Wananchi.

Ziara hiyo ya Mhe. Jokate ni muendelezo wa ziara zake ambazo amekuwa akizifanya katika maeneo mbalimbali ya wilaya ya Temeke. Kupitia ziara hizo kero nyingi zimepatiwa ufumbuzi .