DC JOKETI AAMURU VIONGOZI WA CHUO KUWEKWA CHINI YA ULINZI

Posted on: September 1st, 2021

Mkuu wa wilaya ya Temeke Mhe. Jokate Urban Mwegelo leo Agosti 31,2021 ameungana na wataalam katika ziara ya kutembelea maeneo mbalimbali ya wilaya hiyo.

Akiwa ameambatana na Mkurugenzi-Uthibiti,Ufuatiliaji na Tathmini kutoka NACTE Dkt. Joefrey Oleke walibaini uwepo wa chuo kinachoendeshwa kinyume cha sheria kinachojulikana kama LUBANGO TRAINING COLLEGE kilichopo katika kata ya Mtoni Kijichi mtaa wa Butiama.

Baada ya kufanya mahojiano na mkuu wa chuo,Mhe. Mwegelo aligundua kuwa kwa muda sasa chuo hicho kimekua kikitoa mafunzo bila kupata usajili, pamoja na kutoa mafunzo kwenye mazingira yasiyo rasmi .

"Hamna kitu kibaya kama kufanya utapeli halafu ukadhani hutagundulika,Serikali ina macho kila sehemu,NACTE kaeni hapa na jeshi la Polisi, lazima tupate 'information',chuo hakijasajiliwa lakini hata mandhari yake haistahili,kuna watu wanatoa huduma ambazo kiuhalisia hawastahili kutoa, tushirikiane katika ufuatiliaji, hawa wachukuliwe hatua kali huu ni utapeli" Alisema mkuu huyo wa wilaya.

Kwa upande wake Dkt. Jofrey Oleke amesitisha shughuli zote zinazoendelea katika chuo hicho,huku akielekeza taratibu nyingine za kisheria kufuata.

Aidha Dkt. Oleke amesema kuwa kwa ukaguzi uliofanyika, chuo hicho hakitambuliki NACTE wala VETA.

"Hiki sio chuo ambacho kimesajiliwa na kina'operate' kinyume na taratibu za Nchi, na sisi kama baraza tunasitisha shughuli zote za training katika sehemu hii mpaka pale kitakapokua kimesajiliwa. Lakini pia tutoe rai kwa Wananchi,wasikubali kuleta watoto wao katika vyuo vya uchochoroni, na kama kuna vyuo kama hivi watuambie ili kudhibiti" alisisitiza Dkt. Oleke.

Kufuatia hali hiyo mkuu wa wilaya ya Temeke Mhe. Mwegelo ameamuru viongozi wa chuo hicho kuwa chini ya ulinzi na wanafunzi waliokutwa chuoni hapo kuchukuliwa maelezo ikiwemo mkuu wa chuo hicho Ndg. Geofrey Njegero Mtembeli.

Katika hatua nyingine Mhe. Mwegelo ametembelea miradi ya masoko,miradi ya kufyatua matofali inayoendeshwa na vijana kwa kutumia mikopo iliyotokana na 10% ya mapato ya ndani ya halmashauri ya manispaa ya Temeke, ikiwemo viwanda vya kufyatua matofali vya Toangoma na Ruvuma.