DC Temeke Akutana na Wadau wa Elimu

Posted on: April 19th, 2021

Baadhi ya walimu wakifuatilia kikao kazi ndani ya ukumbi wa Manispaa kilichoandaliwa na mkuu wa Wilaya.

Mkuu wa wilaya ya Temeke Mheshimiwa Godwin Gondwe amefanya kikao kazi na wadau wa ndanbi wa elimu.

Kikao hicho chenye lengo la kukuza ufaulu katika wilaya ya Temeke kimefanyika leo mchana,katika ukumbi wa Manispaa( Iddi Nyundo).

Katika kikao hicho kilichowahusisha Wakuu wa idara za Elimu Msingi na Sekondari,Maafisa Elimu,Waratibu Elimu Kata,Wadhibiti Ubora wa Shule, Watendaji wa Kata, Wakuu wa shule za Sekondari na walimu wakuu wa Shule za Msingi wote,Mhe. Gondwe amesema kwamba lengo la kikao hicho ni kuwakutanisha pamoja wadau wote wa elimu wa ndani,ili kupeana uzoefu,kujadili kwa pamoja kuhusu elimu.Kusikiliza changamoto za walimu,pamoja na kujadili kuhusu  namna bora ya kuinua kiwango cha ufaulu.

Akizungumza wakati akifungua kikao hicho Mhe. Gondwe amewataka wadau wote wa elimu  wa ndani kuifanya elimu kuwa ajenda yao ya kila siku."Ajenda ya elimu iwe ni ajenda endelevu.Mkitoka hapa mkawaambie viongozi wenzenu kule kwenye kata kwamba kila mkikaa elimu iwe ni ajenda yenu.Amesisitiza Mhe. Gondwe.

Aidha Mhe. Gondwe ametoa maelekezo kwamba makubaliano yote  ambayo wamekubaliana katika kikao hicho ,yawekwe kwenye nyaraka moja kama mikakati ya pamoja ya kuongeza ufaulu.

Kadhalika ameelekeza kufanyika kwa makubaliano kati ya Mkurugenzi,watendaji wa kata na maafisa elimu,makubaliano kati ya maafisa elimu na waratibu elimu kata,Waratibu Elimu Kata  na walimu Wakuu pamoja na  Wakuu wa Shule.Walimu Wakuu/ Wakuu wa Shule na Walimu wao.Amesema kwamba kwa kufanya hivyo,itasaidia kila mmoja kutekeleza majukumu yake kikamilifu.

Katika hatua nyingine Mhe. Gondwe amewapongeza walimu wote wa Temeke kwa juhudi kubwa wanazofanya katika kuhakikisha kwamba wanatoa matokeo mazuri kwa watahiniwa wao,pamoja na changamoto  ya kuwepo kwa wanafunzi wengi mashuleni,na changamoto kadhaa zinazohusu maslahi yao.

Kwa upande wao wadau wa ndani wa elimu  ambao walipata fursa ya kuzungumza kuhusiana na kikao hicho,wamemshukuru sana Mhe. Gondwe kwa kuitisha kikao hicho,ambapo wamesema kwamba ni mara ya kwanza kwa wao kukaa pamoja na Mhe .DC kujadili kuhusu elimu,na kwamba kikao hicho kimekuwa cha manufaa makubwa ,kimewabadilisha sana mitazamo,na hawana shaka kwamba kiwango cha ufaulu kitakuwa cha hali ya juu.

Mhe. Gondwe amekuwa akifanya vikao mbalimbali vya wadau  wilayani Temeke.Kikao hicho cha wadau wa elimu ni muendelezo wa vikao vyake vingi ambayo amekuwa akivifanya kwa lengo la kuboresha mahusiano na kuipeleka mbele Temeke.Hata hivyo kikao hicho kama ilivyokuwa kwa vikao kadhaa vilivyopita kimekuwa cha kihistoria,na kuweka alama kubwa katika mioyo na fikra za walimu,na wadau wote wa ndani wa elimu kwa ujumla