DC TEMEKE AMALIZA SITOFAHAMU SOKO LA TAZARA.

Posted on: April 21st, 2021

Mkuu wa Wilaya ya Temeke Mh Godwin Gondwe akizungumza na wafanyabishara wa soko la TAZARA.

Mkuu wa Wilaya ya Temeke Mhe Godwin Gondwe leo ametembelea soko la TAZARA, Temeke Dar es Salaam na kutatua changamoto ya uongozi sokoni hapo.

Akiwa ameambatana na Kaimu Mkurugenzi wa Manispaa  Ndg Deogratius Lukomanya pamoja na timu ya wataalam amezuru katika soko hilo na kupata wasaa wa kuzungumza na wafanyabiashara wa soko hilo.

Mheshimiwa Mkuu wa Wilaya alibainisha wazi mbele ya wafanyabiashara hao kuwa mgogoro mkubwa unaowakabili ni uongozi wa soko ambao ulipatikana kutokana na uchaguzi walioufanya.

Kutokana na uchaguzi huo kuonekana kutokukubaliwa na wafanyabiashara wengi sokoni hapo baada ya kuongea nao ndipo Mhe Mkuu wa Wilaya akawataka kufanya yafuatayo:

Kwanza kabisa ndani ya siku 7 kuanzia leo tarehe April 21, 2021 uchaguzi ufanyike upya kwa kuzingatia katiba ambayo imeandaliwa na wao huku wakisimamiwa  na wataalamu kutoka Manispaa akiwemo mwanasheria.

Sambamba na hilo amewataka kuzingatia usafi katika soko hilo akiwataka kufanya hivyo jumamosi hadi jumatatu akija kukagua asikute uchafu.

Vilevile ametoa maelekezo kwa Mkurugenzi wa Manispaa kupitia idara ya ujenzi kuona namna ya kutengeneza mifereji ili maji yasituame katika soko hilo hasa nyakati za mvua.

Aidha Mhe Mkuu wa Wilaya amewahakikishia wafanyabiashara hao kuendelea kuwa nao bega kwa bega ili kutatua kero zao na kuwawekea mazingira wezeshi ya kibiashara katika eneo hilo.