DC TEMEKE ATOA SIKU 7 KWA MWENYEKITI WA MTAA

Posted on: April 28th, 2021

Mkuu wa Wilaya ya Temeke Mhe Godwin Gondwe amempa siku saba kuanzia jana April 28, 2021 mwenyekiti wa Mtaa wa Azimio kusini Kata ya Azimio, Temeke  Bwana Iddy Njechele kuitisha mkutano wa wananchi katika Mtaa wake.

Mhe Mkuu wa Wilaya ametoa maagizo  hayo alipozuru katika Mtaa huo na kupata wasaa wa kusikiliza kero na changamoto  za wananchi.

Akiwa ameambatana na wataalamu kutoka Manispaa, DAWASA, pamoja kamati ya Ulinzi na Usalama alisikiliza kero mbalimbali za mtaa huo ikiwa ni Kukosekana kwa mikutano ya wananchi ndani ya mtaa, gharama za uondoshaji taka, TASAF, changamoto ya mradi wa  maji , Ulinzi shirikishi (SunguSungu) nk

Wananchi walieleza mbele ya Mkuu wa Wilaya kuwa gharama ya kuzoa taka ni kubwa ambayo ni 3000/= kila chumba, Maradi wa maji ulioko unamnufaisha mwenyeki wa mtaa, wanatozwa malipo ya ulinzi shirikishi wakati hakuna ulinzi unaofanyika.

Sambamba na hilo wamelalamikia TASAF kuwa hawaelewi sifa za mtu anayetakiwa kunufaika na TASAF, pia PASADA hawaelewi vigezo wanavyotumia kupata wanufaika licha ya kuwa inajulikana PASADA iko kwa ajili ya kusadia wananchi walioko katika mazingira mgumu.

Vilevile vile mwenyekiti aliyoko haitishi mikutano ya wananchi katika mtaa hiyo inachangia wananchi kukosa fursa za kujadili masuala ya kimaendeleo.

Aidha kutokana na changamoto na kero hizo Mhe Mkuu wa Wilaya ametoa maagizo yafuatayo:

Mwenyekiti wa Mtaa kuitisha mkutano mkuu wa Mtaa ndani ya siku saba kuanzia leo, pia TAKUKURU wachunguze miradi wa maji katika mtaa huo vilevile Maradi wa maji uliopo kuanzia sasa utakuwa chini ya DAWASA.

Mhe Mkuu wa Wilaya pia ameagiza suala la taka na Sungusungu lijadiliwe katika mkutano mkuu wa  mtaa na mapendekezo yawasilishwe ngazi husika.

"Mwenyekiti wa mtaa wa azimio kusini usiwe mtawala uwe kiongozi ili kuondoa changamoto na kero za wananchi" Alisema Mhe Gondwe.

Kwa upande  wa TASAF Mkuu wa Wilaya amewaagiza idara husika kutoa elimu kwa wanufaika na kuweka wazi sifa zinazotakiwa ili kunufaika, na PASADA pia wafanye hivyo.

Mwisho mhe Mkuu wa Wilaya ameagiza kila kinachofanyika katika Mtaa au Kata kipite katika mfumo sahihi wa Kiserikali.