DIWANI SHIJA AUNGANA NA JESHI LA POLISI KUTOA ELIMU YA UKATILI WA KIJINSIA

Posted on: December 6th, 2023

Na:Shalua Mpanda-TMC Habari

Wakati Nchi inaadhimisha siku 16 za kupinga ukatili wa kijinsia zilizoanza Novemba 25,2023,Diwani wa Viti Maalum mheshimiwa Anna Shija ameungana na Jeshi la Polisi kutoa elimu kwa wanafunzi na wazazi katika kata ya Mbagala Kuu.

Akiwa katika shule ya msingi Maendeleo iliyopo katika Kata hiyo,Mhe.Shija amesema Jamii haina budi kuunga mkono juhudi zinazofanywa na Serikali katika kupambana na vitendo vya ukatili wa kijinsia.

"Tumeamua kuja kutoa elimu hii mashuleni kwa kuwa watoto hawa ndio wahanga wakubwa wa matukio haya,hivyo hatuna budi kama Jamii kujikita kukemea vitendo hivi".Alisema Diwani huyo.

Kwa upande wake mkaguzi msaidizi wa Polisi na kaimu Polisi Kata wa kata ya Mbagala kuu A/INSP Mariam amesema vitendo vya ukatili vimeanza kupungua katika Jamii kutokana na elimu inayotolewa.

"Tumewaeleza aina za ukatili,jinsi ya kuripoti matukio hayo, ili kutimiza malengo yao, wasikae kimya hata kama vitendo hivyo vinafanywa na wazazi wao".Alisema A/INSPMariam

Wakati huohuo Mhe.Shija ametoa msaada wa taulo za watoto(diapers) kwa Wakinamama katika Zahanati ya Mbagala kuu pamoja na vifaa vya kufanyia usafi katika shule ya msingi Maendeleo na msaada wa magodoro katika kituo cha Malezi cha watoto katika shule ya chekechea Mbagala kuu.

Ziara hii ni muendelezo wa ziara za Diwani huyo wa Viti Maalum kutembelea makundi mbalimbali na kutoa elimu kuhusu masuala ya kijamii sambamba na kutoa misaada kwa makundi hayo.