DOKTA SAMIA AMEJIPANGA KUTENGENEZA MAZINGIRA WEZESHI KWA WAZALISHAJI- WAZIRI JAFFO

Posted on: October 3rd, 2024

Na: Sweetbetter Njige

       TMC Habari.

Leo Oktoba 2, 2024 Waziri wa Viwanda na Biashara Mhe. Dkt. Sulemani S. Jaffo ameongoza hafla fupi ya kufunga Maonesho ya Kimataifa ya Viwanda (TIMEXPO) yaliyofanyika katika Viwanja vya Mwl. Nyerere (Sabasaba) Temeke, Dar es Salaam.

Akizungumza katika hafla hiyo Waziri Jaffo amesema ni fahari kwa Watanzania kuzalisha, kusambaza na kutumia bidhaa zilizozalishwa ndani ya Nchi na kuwa Serikali imejipanga kuboresha mazingira kwa wazalishaji ili kuimarisha biashara na ajira. Amesema

"Watanzania tuamke, tujivunie vya kwetu, nimeona fahari sana kukagua bidhaa na zimeandikwa 'made in Tanzania'...Serikali ya Rais Samia inaendelea kutengeneza mazingira wezeshi kuhakikisha uwekezaji wa viwanda na uchumi unaenda vizuri. Sisi kama watendaji, tutajitahidi kupitia mambo yenye kuleta changamoto kubwa yanatatuliwa ili kuhakikisha bidhaa za ndani zinapata masoko kwa ajili ya kutunza ajira na uendelevu wa viwanda hivi"

Aidha Mhe. Jaffo amewapongeza wazalishaji wote ikiwemo wa viwanda vidogo, vya kati na vikubwa kuendelea kuwa mstari wa mbele katika kuzalisha ajira kwa vijana kama lilivyo lengo la sekta binafsi ili kukuza uchumi wa mtu mmoja mmoja na Taifa kwa ujumla. 

Akizungumza kwa niaba ya Mkuu wa Mkoa wa Dar es Salaam Mkuu wa Wilaya ya Temeke mhe. Sixtus Mapunda amesema

"Nawashukuru waandaji wa maonesho haya CTI (Confederation of Tanzania Industries) na Mamlaka ya maendeleo ya biashara Tanzania (Tantrade) kwa maonesho mazuri, naamini Temeke tutaendelea kuwa wenyeji kwa maonesho haya ambayo naamini yatakuwa ya pili kwa ukubwa baada ya yale ya sabasaba".

Maonesho ya kimataifa ya viwanda yamefanyika mara ya pili na kwa mafanikio makubwa kutokaka kuwa na washiriki 79 mwaka 2023 kufikia washiriki 257 mwaka 2024.