DSM YAADHIMISHA SIKU YA UKIMWI KIPEKEE

Posted on: December 1st, 2022

Leo Disemba 1, mkoa wa Dar es Salaam umeungana na Mikoa mingine Nchini na Duniani kote kuadhimisha siku ya UKIMWI.Maadhimisho hayo  yamefanyika katika viwanja vya Zakhem-Mbagala ambapo wilaya zote za Mkoa huu zimekusanyika kuadhimisha siku hii muhimu ambayo Kitaifa imefanyika mkoani Lindi.

Akizungumza mara baada ya kupokea taarifa ya hali ya maambukizi kwa mkoa wa Dar es Salaam iliyosomwa na mganga wa mkoa daktari Rashid Mfaume mbele ya muwakilishi wa mkuu wa mkoa ambaye pia ni Mkuu wa Wilaya ya Ilala Mheshimiwa Ng`wilabuzu Ludigija alisema.

"Niwashukuru sana Viongozi na Wananchi kwa kushiriki, kama kauli mbiu inavyosema "IMARISHA USAWA" usawa katika ushiriki na ushirikishwaji wa jamii katika shughuli za udhibiti wa maambukizi ya virusi vya UKIMWI kuanzia upangaji wa mikakati, utoaji na upatikanaji wa huduma za VVU na UKIMWI. Wito wangu kwa jamii na wadau, takwimu hizi zisitupumbaze tukarudi nyuma, tuendelee kukemea tabia ovu zinazotokea katika jamii zetu kama biashara ya ngono".

Mkoa wa Dar es Salaam umeshika nafasi ya 7 kitaifa kwa maambukizi ya virusi vya UKIMWI Nchini,huku takwimu zikionesha katika kila watu 100 watu wa 5 wana maambukizi ya virusi vya UKIMWI na 1% kati yao ni vijana wa chini ya miaka 15-24.

Kila mwaka ifikapo Disemba 1, Dunia huazimisha siku ya UKIMWI kwa lengo la kuendelea kuelimisha,kukumbusha jamii juu ya uwepo na athari za ugonjwa huo, na kuelezea namna bora za kudhibiti ama kupunguza maambukizi kutokana na mabadiliko ya teknolojia na utandawazi.