ELIMU YATOLEWA SHULENI, MLIPUKO WA RED EYES

Posted on: January 19th, 2024

Na: Sweetbetter Njige

Mratibu wa magonjwa ya macho wilaya ya Temeke Daktari Daniel Ringo ametembelea shule ya msingi Temeke na kutoa elimu juu ya ugonjwa wa macho unaosambaa kwa kasi "Viral Keratoconjactivitis" (Red Eyes) unaosambazwa na kirusi "Adenovirus" unaoathiri zaidi kifuniko cha juu cha jicho kinachojulikana kitaalam kama "Conjunctivitis"

Akizungumza na Wanafunzi na baadhi ya walimu wa shule hiyo Dkt Ringo amesisitiza juu ya kuzingatia usafi wa mikono, kuepuka kuchangia vitu mbalimbali hasa taulo,leso na kuepuka kugusa machozi na matongotongo ya muathirika ili kujikinga na ugonjwa huo.

"Tumekuja hapa kuwapa elimu ni namna gani ugonjwa huu unaanza, namna ya kuzuia na matibabu yake. Dalili za ugonjwa zinajulikana na zipo hivyo kwa watoto na watu wazima mfano jicho kuwa jekundu, kuogopa mwanga, kutoa machozi,matongotongo. Lengo ni kupunguza ongezeko la maambukizi wilaya ya Temeke"

Aidha Dkt Ringo amewataka walimu na wazazi kutambua waathirika na kuwafikisha katika vituo vya afya badala ya kutumia dawa kiholela na kuwafungia ndani ili wasiambukize watu wengine.

"Nashauri kwa watoto wenye ugonjwa walimu tuwasiliane na wazazi wapelekwe katika vituo vya afya wapatiwe ushauri na matibabu ya kitaalam badala ya kutumia dawa kiholela"

Ugonjwa wa macho mekundu umesambaa kwa kasi mkoani Dar es Salaam elimu imetolewa kwa watoto wakiwa kwenye hatari kubwa zaidi ya kuambukizwa.