''FUATENI SHERIA NA TARATIBU, SERIKALI ITAWAUNGA MKONO'' MKURUGENZI

Posted on: August 3rd, 2023

Na; Joanita Joseph

Mkurugenzi wa Halmashauri ya Manispaa ya Temeke Ndugu Elihuruma Mabelya pamoja na Wajumbe wa Kamati ya Mipangomiji  ya Baraza la Madiwani na wataalam wa Manispaa ya Temeke, leo hii 03 Agosti 2023 wamefanya ziara ya kutembelea viwanda na vituo vya mafuta , yenye lengo la kuona shughuli za uzalishaji, usalama wa wafanyakazi, ukaguzi wa vibali vya uendeshaji, nyaraka za malipo ya Serikali na kusikiliza changamoto zinazowakabili  pamoja na kutoa elimu juu ya usafi wa mazingira.

Miongoni mwa viwanda vilivyotembelewa ni kiwanda cha Polyback Ltd  kilichopo Kata ya  Mbagala kinachojihusisha na utengenezaji wa mifuko ya plastick, chenye idadi ya wafanyakazi takribani 700.

Akizungumza kwenye ziara hiyo Mkurugenzi Mabelya amepongeza uwekezaji mkubwa unaofanywa nchini na kusisitiza mshikamano baina ya Serikali na wawekezaji.

"Sera ya Mhe. Rais Dkt Samia Suluhu Hassan ni kuhakikisha viwanda vinafanya kazi havifi hivyo, fanyeni biashara na fuateni Sheria,Kanuni,taratibu na miongozo ya uwekezaji  na Halmashauri itawaunga mkono".Alisema Mkurugenzi huyo

Wajumbe wa Kamati hiyo pia wamekagua vibali mbalimbali na kutaka wawekezaji hao kuwa wawazi endapo watabaini changamoto yoyote itakayo athiri utendaji wao.

Kwa upande wake mwenyekiti wa Kamati ya mipangomiji Mhe. Juma Mkenga ambaye pia ni diwani wa Kata ya Miburani amepongeza uwekezaji huo wa viwanda kwa kuwa utasaidia kuongeza fursa za ajira kwa watanzania.

Manispaa ya Temeke ni moja ya Manispaa nchini ambazo zinategemea viwanda katika kukuza mapato yake na kutekeleza  miradi ya maendeleo.