"HALMASHAURI HAKIKISHENI MNATENGA BAJETI YA KUTOSHA KUENDELEZA UMILIKISHAJI NA UPANGAJI WA MAENEO YENU" WAZIRI MABULA

Posted on: December 17th, 2022

Na; Nassoro Rashid

TMC Habari

Kauli hiyo imesemwa leo Disemba 17, 2022 na Waziri wa Ardhi Nyumba na Maendeleo ya Makazi Mhe. Angelina Mabula wakati akiendesha zoezi la utoaji wa hati za ardhi lililosimamiwa na ofisi ya Kamishna Msaidizi wa ardhi Mkoa wa Dar es salaam kwa kushirikiana na halmashauri ya manispaa ya Temeke lililofanyika katika viwanja vya Shule ya Msingi Mbagala Kuu wilayani humo.

Akiongea na Wananchi Mhe. Mabula amesema lengo la kuwasogezea huduma hiyo karibu ni kuweza kuwaimarisha na kuwawezesha kupata nyaraka sahihi na uhakika wa usalama wa miliki zao huku akiwasisitizia kuhakikisha kabla ya mwaka huu kuisha wawe wamerasimisha

"Mhe. Rais ameelekeza tuhakikishe kabla ya mda kuisha, wale wote wanaohitaji kufanyiwa urasimishaji wafanyiwe na hii ndo tunakwenda nayo kwa kasi, kwa mkoa wa Dar es Salaam na Halmashauri zake zote tano, idadi ya viwanja vilivyotambuliwa kwa ajili ya urasimishaji ni 610,689 kwa wilaya zote, michoro 2084 imeidhinishwa na viwanja 549,387 vimepangwa na vimeidhinishwa tayari kwa umilikishaji". Alisema Mhe. Mabula

Sambamba na hayo Mhe. Mabula amesema mpaka sasa umilikishaji umefanyika huku hati zilizoandaliwa ni 24689 kati ya viwanja vilivyoidhinishwa 549,387 kwa Mkoa wa Dar es salaam na kuwataka wananchi kutumia fursa hiyo ili kupata hati zao kadhalika ametoa maelekezo mbalimbali kwa viongozi wa Halmashauri na ofisi ya Kamishna Msaidizi.

"Hakikisheni Halmashauri mnatenga bajeti za kutosha kuweza kuendeleza zoezi la umilikishaji na upangaji katika maeneo yenu, naelekeza uandaaji wa hati kwa haraka kulingana na maombi yaliyokamilishwa, naelekeza ndani ya siku 14 kuhakikisha mnayafanyia kazi maombi ya hati na kuwapatia wananchi, naelekeza hakuna kutoa hati yoyote kwa mkono kama tulivyokuwa tunatoa zamani". Alisema Mhe. Mabula

Kadhalika Mhe.Waziri Mabula ameelekeza kabla ya mwaka huu kuisha makampuni yote ya urasimishaji ndani ya jiji la Dar es salaam chini ya usimamizi wa Kamishna Msaidizi kukaa kikao kazi pamoja na Wakurugenzi wa Halmashauri zote ili kuja na mikakati mahsusi ya kukwamua zoezi hilo.