Halmashauri ya Manispaa ya Temeke yazidi kutanua wigo katika sekta Afya.

Posted on: June 10th, 2019

Halmashauri ya Manispaa ya Temeke kwa kushirikiana na Mfuko wa Taifa wa Bima ya Afya wameendelea na kampeni ya uhamasishaji wa wananchi kujiunga na Mfuko wa Afya ya Jamii iCHF (improved Community Health Fund) lengo kuu likiwa ni kuhakikisha wakazi wa Wilaya ya Temeke hasa wenye kipato cha chini wanapata huduma ya  matibabu kwa urahisi.

 Kwa Wilaya ya Temeke Huduma kwa kadi  zinapatikana katika vituo vyote vya Serikali ambavyo ni Zahanati, Kituo cha Afya, Hospitali ya Wilaya pamoja na Hospitali ya Mkoa na mpaka sasa kwa Wilaya ya Temeke yenye kata 23 kuna zaidi ya wanachama 536 wanaohudumiwa na Bima hii.

Katika uhamasishaji huo wa kuhakikisha kila mwananchi wa Manispaa anapata elimu ya Afya, na kuelezwa faida za kujiunga na mfuko wa matibabu kupitia bima ya afya ambapo wameelezwa kuwa, gharama ya bima hiyo kwa mtu mmoja ni shilingi 40,000/- kwa mwaka na katika kaya yenye watu 6,  ambapo wakuu wa kaya 2 na watoto 4 wenye umri chini ya miaka 18 watakatwa kiasi cha shilingi 150,000/- kwa mwaka kama gharama za matibabu kwa kutumia bima hiyo.

Nae Mganga Mkuu wa Manispaa ya Temeke Dr.Gwamaka Mwabulambo amesema, mwitikio wa wananchi wa Wilaya ya Temeke kuhusu kadi za matibabu ni wawastani, japo elimu inazidi kutolewa kwa kiasi kikubwa ili kupata wanachama wengi zaidi kwakuwa suala la afya ni la msingi zaidi kwa ustawi wa Manispaa na Taifa kwa  ujumla.

“Kazi kubwa ni kuhakikisha dawa zinapatikana na wanachama wetu wanapata huduma stahiki ,hivyo niwasihi wananchi kuhakikisha wanakata bima hii, kwa kuwa kuna wakati huna fedha hiyo ya matibabu lakini kwakuwa unabima basi una uhakika wa kupata matibabu kwa wakati” Alisema Dr.Mwabulambo.

Nae Mratibu wa Bima ya Afya ya iCHF wa Manispaa wa Temeke ndugu Christian Mwaisoloka Alisema, timu ya uratibu wa bima hiyo imejizatiti kuhakikisha elimu inawafikia wananchi wote ili kupata wanachama wa kutosha na kuhakikisha afya bora inapatikana kwa wakazi kwa maendeleo endelevu

“Mkakati tulio nao kwa sasa ni kupita na gari la matangazo ili kuwahabarisha umma faida za kuwa na bima hii  pamoja na kubandika matangazo maeneo mbalimbali pamoja na kuandaa mikutano ya hadhara kwaajili ya elimu ya Afya na umuhimu wa bima hiyo”.

Sambamba na kadi ya iCHF Manispaa ya Temeke imejizatiti kuhakikisha afya ya wakazi wake hususani wazee inaimarika kwani ilifanikiwa kutengeneza vitambulisho 10,576 vya Afya, vya  bure vya wazee kwaajili ya kurahisisha matibabu na kuboresha afya zao na inampango wa kutengeneza vitambulisho vingi zaidi katika awamu ijayo.Alisema Christian.

Kitambulisho cha huduma bure kwa wazee (Kadi) kinapatikana papo kwa hapo na huduma rasmi ya matibabu huanza kutolewa baada ya siku 14 na (matibabu) kwa kadi  hiyo ya wazee hutolewa ndani na nje ya Mkoa alipopatia kadi hiyo hivyo kuwatoa hofu wazee kuhusu matibabu ya afya zao popote watakapokuwa, alibainisha zaidi mratibu huyo.

Ikumbukwe kuwa Serikali ya Jamuhuri ya Muungano wa Tanzania ipo katika hatua ya kuhakikisha watu wote wanatumia bima ya Afya. Lengo ni kuondoa changamato zinazowakabili wananchi wengi na hasa wa vijijini pindi wanapokuwa na matatizo ya Kiafya.