''Hatutaki Barabara za Vumbi ''Mstahiki Meya Temeke

Posted on: December 11th, 2019

Mstahiki Meya Mhe. Abdallah Chaurembo (katikati) akiendesha mkutano wa baraza la Madiwani la Manispaa ya Temeke.Kulia kwake ni naibu Meya Mhe.  Juma Mkenga na Kushoto ni (Katibu wa baraza) kaimu mkurugenzi wa manispaa Ndg.Deogratius Lukomanya.

Mstahiki Meya wa Manispaa ya Temeke Mhe. Abdallah Chaurembo ameutaka Wakala wa barabara za Mijini na vijijini ( TARURA) wilaya ya Temeke kujielekeza katika kujenga barabara za lami,kwani kwa kufanya hivyo wataokoa fedha nyingi tofauti na ilivyo sasa ambapo fedha nyingi hutumka kufanya ukarabati wa barabara kwa sababu barabara zinatengenezwa kwa udongo hivyo mvua zinaponyesha udongo unasombwa na maji barabara zinabaki katika hali mbaya,hali inayosababisha kuhitaji matengenezo ya mara kwa mara.

Akizungumza katika mkutano wa barazara la madiwani ulichofanyika leo Desemba 11,2019 Mhe Chaurembo amemtaka meneja wa TARURA wilaya ya Temeke Mhandisi Nicholaus kufanya makadirio ya barabara zote zenye matatizo na kupeleka kwa Mkurugenzi,kupitia ofisi ya mkurugenzi mapendekezo yapelekwe kwenye vikao wao kama madiwani watayajadili makadirio hayo na kwa kuzingatia bajeti iliyotengwa kwa ajili ya kuchangia ujenzi wa barabara,barabara hizo zitengenezwe.

‘’Sisi ndio tunaopitisha bajeti,tunapopitisha bajeti tutoe maelekezo nini tunataka.Katika bajeti, mwaka huu wa fedha tumetenga kiasi cha Sh. 900,000,000 kama mchango wa barabara TARURA, fedha hizo zinaweza kutumika kutengeneza barabara zetu kwa kiwango ambacho zitadumu.Barabara za vumbi hatuzitaki’’ Alisisitiza Mhe. Chaurembo.

Aidha Mhe. Chaurembo ametoa rai kwamba kwa sababu huwa inafahamika kuwa kuna misimu ya mvua,na kwamba baada ya mvua hizo barabara huharibika sana,ni vema wakatenga fedha kwa ajili ya dharura ya matengenezo ya barabara,barabara ziwe zinafanyiwa matengenezo ,ili kuwaondolea wananchi adha wanayoipata kutokana na kuharibika kwa barabara.

Baraza la madiwani la halmashauri ya manispaa ya Temeke linakutana kwa siku mbili ,leo ikiwa ni siku ya kwanza. Baraza lilikuwa na ajenda 4, miongoni mwa  ajenda hizo  ni uwasilishaji wa taarifa  kutoka kwenye kata,ambapo kata zote 23 zimewasilidha taaarifa zake. Baraza litaendelea tena kesho Desemba 12.