HOSPITALI YA KISASA YA WILAYA KUJENGWA CHAMAZI

Posted on: April 2nd, 2024

Mkurugenzi wa manispaa ya Temeke Elihuruma Mabelya ameambatana na watendaji kutoka hospitali ya Taifa Muhimbili, kujadili masuala mbalimbali ya kitaalam pamoja na kukagua eneo litakalojengwa hospitali ya wilaya ya Temeke katika eneo la Vikuruti Village, Chamazi.

Mkurugenzi Mabelya amesema

"Ni lengo na mipango ya halmashauri tuwe na hospitali kubwa ya wilaya ya Temeke, kwa ushirikiano na wenzetu wa Muhimbili baada ya maelekezo ya Serikali chini ya wizara ya afya, tumefika kujadili na kukagua eneo ambalo limetengwa kwa ajili ya ujenzi wa hospitali hiyo hapa Vikuruti, Chamazi na sasa tunakwenda kwenye hatua nyingine ya utekelezaji"

Akizungumza juu ya matarajio baada ya utekelezaji wa hospitali hiyo mkurugenzi Mabelya ameeleza kuwa

"Uwepo wa hospitali hii utakua tiba na utaondoa kero na mahangaiko ya Wananchi kwenda kufuata huduma mbali.

Kwa kuzingatia utaalam ambao wenzetu Muhimbili wanao na kwa ushirikiano tuliouanzisha tumejipanga katika eneo  la utoaji wa huduma, uwekezaji utahusisha idara na vitengo vinavyofanana kwenye eneo hili la Muhimbili. Uwekezaji utakwenda kwa kasi na wa utakuwa wa kisasa".

Kwa upande wake Daktari. John Rwegasha, mkurugenzi wa huduma za tiba hospitali ya Taifa Muhimbili amesema

"Tumekuja hapa kutekeleza agizo la Serikali kupitia waziri wa afya baada ya kusikia uhitaji wa Wananchi wa eneo hili kukosa kituo kikubwa cha huduma za afya.

Baada ya mchakato muhimu kukamilika, tumejipanga kuimarisha maeneo ya ushirikiano baina ya hospitali ya Muhimbili na hospitali nyingine za rufaa ili kuboresha huduma za afya na maslahi ya Wananchi  kwa ujumla"

Manispaa ya Temeke chini ya Serikali ya awamu ya sita ikiongozwa na Rais Samia Suluhu Hassan, inaendelea kupokea maboresho makubwa katika sekta ya afya ambapo uwekezaji unafanywa kwa kujenga vituo vipya vya afya pamoja na kupanua hospitali zenye uhitaji.