"HUDUMA ZIMEONGEZEKA KWENYE HOSPITALI ZETU KUTOKANA NA ONGEZEKO LA VIFAA TIBA" MGANGA MKUU TEMEKE

Posted on: October 22nd, 2022

Na: Sweetbetter NjigeTMC Habari

Leo Oktoba 22,2022 mganga mkuu wa manispaa ya Temeke Daktari Irene Haule ameendesha kikao cha tathmini cha robo ya kwanza cha Idara ya Afya.

Kikao hicho kimelenga kuangazia namna Vituo vya Afya vilivyofanikiwa katika utoaji wa huduma kwa kipindi cha Julai mpaka Septemba 2022.

Kimehusisha Waganga Wafawidhi wa Vituo vya Afya, Wahasibu, Makatibu,Maafisa Wagavi pamoja na Timu ya Uendeshaji Huduma za Afya Halmashauri ya Manispaa ya Temeke (CHMT) na Wahudumu wengine wa Afya, ambapo Daktari Irene alisema,

"Kikao hiki kinalenga kuangalia hali ya utekelezaji wa utoaji wa huduma na yote yaliyofanyika katika vituo vyetu vya Afya katika kipindi cha Julai-Septemba, nia ya kufanya hivi ni kuona wapi tumepiga hatua,wapi tumeteleza na nini tufanye ili kutekeleza mipango na majukumu yetu ipasavyo katika robo ya pili na robo nyingine zinazofuata"

Akizungumzia changamoto na mafanikio yaliyopatikana katika robo ya kwanza Daktari Irene alisema,

"Tumepata mafanikio makubwa katika robo ya kwanza, huduma zimeongezeka kwenye hospitali zetu kutokana na ongezeko la vifaa tiba kama Ultra sound katika kituo cha Yombo Vituka, lakini pia tumepata changamoto chache ambazo zinaendelea kutupa hamasa ya kupanga mikakati ya kukabiliana nazo, na kuona ni kwa namna gani tunaweza kuziondosha katika robo ya pili na robo zingine"

Aidha Daktari Irene amewaagiza watendaji walio chini yake kuwajibika kufanya kazi kwa weledi na kwa kuzingatia malengo waliojiwekea katika robo ya pili.

Kikao cha leo ni muendelezo wa kikao cha kwanza kilichojulikana kama 'Roadmap' ambapo watumishi wa Idara ya Afya chini ya Daktari Irene Haule waliamua kujiwekea mikakati ya utendaji kazi na kufanya vikao katika kila robo ili kutathmini utendaji kazi katika sekta hiyo na kufanyia maboresho changamoto zinazopatikana ili kuboresha huduma.