IDARA YA ELIMU SEKONDARI YAKUTANA NA WANAFUNZI WENYE MAHITAJI MAALUM

Posted on: October 18th, 2024

Na: Sweetbetter Njige

       TMC Habari

Halmashauri ya Manispaa ya Temeke kupitia Idara ya Elimu Sekondari imekutana na wanafunzi wenye mahitaji maalum kutoka Shule za Sekondari za umma zilizopo katika Manispaa ya Temeke lengo likiwa ni kufanya maboresho katika mahitaji yao.

Akizungumza katika Mkutano huo Afisa Elimu anayeshughulikia elimu maalum Bi. Martha Kusaga amefafanua juu ya utofauti wa aina za mahitaji na namna ya kuyafikia ikiwa ni pamoja na kupokea maoni ya Wanafunzi hao na kuweka maazimio yatakayotekelezwa.

"Mfano wa mahitaji maalum kwa wanafunzi hawa ni pamoja na ongezeko la muda katika mitihani ( au kupata usaidizi kutokana na aina ya ulemavu) au kuweka /kuboresha aina ya miundombinu inayohitajika. Hivyo, tunakutana ili viongozi wajue mahitaji yenu" alisema Bi. Martha.

Aidha ameeleza kwamba wameazimia kuwa kila shule iwe na walimu wasimamizi wa mahitaji maalum ili kusikiliza na kutatua changamoto za wanafunzi hao pamoja na kutenga siku maalum ya kukutana na kuzungumza nao.

"Mungu anatambua uwepo wenu, hali kadhalika Serikali yenu inatambua uwepo wenu, nanyi naomba mtambue uwepo wenu na kusudi lenu la kuwepo hapa," alisema

Bi. Martha

"Mungu hajakosea kutuumba tulivyo, tujikubali na kujipenda ili tuishi kwa furaha"

Mkutano huo umefanyika katika Shule ya Sekondari Kibasila ambapo wanafunzi hao pamoja na kueleza changamoto zao walipata wasaa wa kuonesha pia vipaji vyao na kupata burudani mbalimbali ikiwemo kuimba wimbo wa Taifa kwa alama na kucheza.