JAMII YATAKIWAKUFICHUA VITENDO VYA UKATILI WA KIJINSIA

Posted on: November 30th, 2022

Na:Shalua Mpanda-TMC

Ikiwa Dunia inaadhimisha siku 16 za kuhamasisha mapambano dhidi ya ukatili kwa Wanawake na Watoto,Jamii imetakiwa kutokufumbia macho vitendo hivyo vya unyanyasaji.

Wito huo umetolewa na Mrakibu Mwandamizi wa Polisi mkoa wa kipolisi Chang'ombe SSP Ariziki Makwaya wakati akizungumza na wakazi wa kata ya Kurasini Novemba 30,2022.

Amesema kuwa matukio mengi ya kikatili na unyanyasaji yanatokea kwenye jamii na mara nyingi yamekuwa yakifichwa kutokana na mahusiano ya karibu na wanaotekeleza matukio hayo.

"Jeshi la Polisi linatekeleza majukumu yake ya ulinzi na usalama,na hatuwezi kutenganisha suala la usalama na haki ya kuishi ambayo imezungumzwa kwenye katiba ya Jamhuri ya Muungano wa Tanzania".Alisema SSP Makwaya.

Aidha amewataka wanafunzi wenye tabia zisizo na maadili kuacha tabia hizo, badala yake wajikite katika masomo kwa kuwa kwa kufanya vitendo hivyo watajiingiza kwenye mikono ya sheria.

Diwani wa viti maalum mheshimiwa Caroline Henrich ambaye alikuwa ni mmoja wa waalikwa katika maadhimisho hayo amewaasa wazazi kuwa karibu na watoto wao na kujenga tabia ya kuwa marafiki ili waweze kutambua changamoto wanazokutana nazo.

Maadhimisho ya siku 16 za kupinga ukatili wanawake na watoto yanafanyika kila mwaka,ili kuikumbusha Jamii kukemea vitendo hivi vinavyozidi kushika kasi hapa Nchini.