"Jitihada Hizi za Usafishaji na Utunzaji wa Mazingira Ziendelezwe" LEAT

Posted on: June 16th, 2021

Maafisa sheria kutoka LEAT,Maafisa kutoka Manispaa ya Temeke,Afisa mtendaji wa kata ya Mbagalakuu na Mwenyekiti wa mtaa wa Mbagalakuu Mashariki wakiwa katika ziara ,soko la Njia ya Ng'ombe,kukagua hali ya usafi na utunzaji  wa mazingira ya soko hilo.

Maafisa sheria kutoka LEAT,Maafisa kutoka Manispaa,Viongozi wa kata na mtaa wakiwa katika majumuisho,mara baada ya ziara ya ukaguzi wa hali ya usafi na utunzaji wa mazingira ya soko la Njia ya Ng'ombe.

Kauli hiyo imetolewa na Afisa sheria  kutoka  Shirika  la Lawyers' Environmental Action Team (LEAT) wakili Baraka Thomas mara baada ya ziara fupi iliyofanywa na Maafisa wa shirika hilo kwa kushirikiana na Maafisa Mazingira na Afisa Maendeleo ya Jamii kutoka manispaa ya Temeke,pamoja na uongozi wa kata ya Mbagala kuu na serikali ya mtaa wa Mbagala kuu Mashariki,ambapo walitembelea katika soko la Njia ya Ngombe lililopo katika kata ya Mbagala kuu ,soko ambalo   siku za nyuma  lilionekana kuwa na changamoto kubwa ya uchafuzi wa mazingira.

Ziara hiyo iliyofanyika jana Jumatano, ililenga kuangalia hali  ya usafi wa mazingira katika eneo hilo .

Akizungumza wakati wa majumuisho ya ziara hiyo, yaliyofanyika katika ofisi ya Mtendaji wa kata, wakili Thomas amesema "Leo katika ziara yetu tumetembelea soko la Njia ya ng'ombe, katika kata ya Mbagala Kuu,tukiwa sisi pamoja na watumishi wa Manispaa,lakini pia na viongozi wetu wa Kata na serikali ya Mtaa.

Tumeona kwamba kuna shughuli  za kibinadamu ambazo zinafanyika katika eneo hilo,lakini miundombinu ya usafi kwa mfano utiririshaji maji, baada ya watu kufanya shughuli zao za usafi,upishi na kadhalika ni changamoto, lakini tumeona pia kwamba kuna jitihada kubwa zimefanyika kutoka serikali ya mtaa,na kata,kwa maana ya kuhimiza wananchi kuendelea kusafisha na kutunza maeneo yao ya kazi,na tunaona elimu ambayo wameitoa,imekuwa ikizaa matunda kwani  kuna jitihada ambazo zimeendelea kufanyika hasa za kusafisha maeneo hayo,na kuandaa miundombinu  ya kuhakikisha kwamba maji machafu hayatiririshwi ovyo katika maeneo ya soko,jitihada hizi za usafishaji na utunzaji wa mazingira ziendelezwe.

Vilevile tumeona tayari kuna vyoo vimejengwa pale, kama miundombinu ya soko,na  'tank' kwa ajili ya kumwaga maji machafu ujenzi wake unaendelea, lakini muhimu zaidi ambacho tunasisitiza ni kwamba tunapenda kuona  Wananchi wanaofanya shughuli zao za kila siku katika eneo lile  wanaendelea kuhakikisha kuwa mazingira yao yanakuwa safi muda wote,kwa sababu wanahudumia watu.Afya ya watu ni kipaumbele kwetu sisi,na wananchi wote kwa ujumla."

Wakili huyo amesema kwamba hatua  iliyofikiwa katika usafishaji na utunzaji wa mazingira ya eneo hilo ni nzuri,japo bado haijafikia shabaha  kubwa sana.

Ametoa wito kwa viongozi kuendelea kuwakumbusha Wananchi wajibu wao wa kusafisha na kuhifadhi mazingira, kuendelea kuwaelimisha, kuendelea kufanya ukaguzi wa mara kwa mara ili hali ya usafi katika eneo hilo,pamoja na maeneo mengine, iendelee kuimarika.

Kadhalika ameupongeza uongozi wa serikali ya Mtaa na Kata pamoja na viongozi wote wa wilaya ya Temeke kwa jinsi wanavyoendelea kuwahimiza Wananchi kufanya usafi.

Aidha  ameomba ushirikiano uliopo kati ya sekta Binafsi,Mashirika na Serikali uendelee kuwepo, ili kwa pamoja waendelee kuhimiza suala la usafi na utunzaji wa mazingira.

Katika hatua nyingine mtendaji wa kata ya Mbagala kuu, ndugu  Beatus Kachenje amewashukuru LEAT kwa kuwa mstari wa mbele katika kushirikiana na Serikali kutatua changamoto mbalimbali za kimazingira,ambapo amesema yeye pamoja na watendaji wote wa Temeke wataendelea kushirikiana nao,na kwamba anaamini kuwa kwa jitihada zinazoendelea kufanyika sasa,kwa siku za usoni Temeke itakuwa katika kiwango kizuri sana cha usafi.

Naye mwenyekiti wa mtaa wa Mbagala Kuu Mashariki,ndugu Fabian  Chilumba  amesema kwamba ziara ya Maafisa hao wa LEAT katika mtaa wake,italeta matokeo makubwa,kwa sababu pamoja na jitihada zote wanazoendelea kuzifanya  ili kuweka mazingira katika hali ya usafi,lakini wakati mwingine wananchi wanahitaji kuona sura tofauti,na kusikia sauti tofauti,ili kuhamasika zaidi kufanya jambo fulani.

LEAT ni shirika lisilo la Kiserikali linalojihusisha na utunzaji wa mazingira na uhifadhi wa rasilimali za Maliasili.