Kamati ya Fedha yafanya ziara na kujionea miradi ya maendeleo inayotekelezwa.

Posted on: February 4th, 2019

Kamati ya Fedha na Utawala imefanya ziara ya kukagua na kutembelea miradi ya maendeleo inayotekelezwa na Manispaa ya Temeke.

Ziara hiyo iliongozwa na Naibu Meya wa Manispaa ya Temeke Mh Juma Nkenga pamoja na Madiwani wanaounda kamati hiyo.

Katika ziara hiyo, wanakamati walifanikiwa kutembelea miradi mbalimbali inayotekelezwa kwa fedha za ndani pamoja na fedha toka Serikali kuu. Miradi hiyo ni pamoja na shule ya msingi Toangoma iliyopo katika kata ya Toangoma yenye jumla ya wanafunzi 3470 ambapo 22 miongoni mwao  wana tatizo la uoni(Wasioona)

Shule hii ilipata mradi wa vyumba vitatu vya madarasa,matundu 24 ya vyoo na mabweni mawili yenye uwezo wa kubeba wanafunzi 80 kila moja kwa ajili ya wanafunzi wasioona.

Sambamba na hilo Kamati ilitembelea shule ya Msingi Mgeni nani ambapo ujenzi wa vyumba vitatu vya madarasa vimekamilika na wanafunzi wanatumia madarasa hayo,vile vile ujenzi wa madarasa katika shule ya msingi Msufini pamoja na shule ya Msingi Faraja ambayo ilipata mradi wa kujengewa matundu 24 ya vyoo toka Mamlaka ya Elimu Tanzania TEA , shule hii ipo katika kata ya Mianzini .

Pamoja na hilo kamati ya fedha ilitembelea na kujionea ujenzi wa barabara ya Mchumila inayojengwa wa kwa kiwango cha zege kwa kutumia vyanzo vya ndani na ina urefu wa Km 1.1

Kamati ilifurahishwa na miradi hiyo na hatua iliyofikia na kuwasisitiza wasimamizi wa miradi hiyo kuhakikisha kiasi kilichotengwa kinaenda sambamba na hali halisi ya mradi husika ili kuepuka ubadhirifu wa fedha.

Pamoja na hilo Kamati ilijionea ujenzi wa kituo cha Afya Yombo Vituka kinachotarajiwa kukamilika 2020 na kinajengwa kwa makusanyo ya ndani, mpaka kukamilika kwa ujenzi huu kitaweza kuhudumia wakazi 108,309 wa kata ya Yombo Vituka na maeneo ya jirani.Jengo hili likikamilika litatoa huduma kwa wagonjwa wa ndani IPD ,huduma kwa wagonjwa wa nje OPD, Huduma za upasuaji, X-Ray, Ultra Sound, Huduma za kupunguza makali ya Ukimwi CTC na huduma za maabara. Mpaka sasa ujenzi huu umekamilika kwa asilimia 60%.