KAMATI YA LISHE TEMEKE KUJA NA KONGAMANO MAGONJWA YASIYOAMBUKIZA

Posted on: November 11th, 2024

Na: Shamsi Dadi

       TMC Habari.

Leo Novemba 11,2024 kamati ya lishe halmashauri ya manispaa ya Temeke imefanya kikao cha robo ya kwanza (Julai-Septemba 2024-2025) kujadili mafanikio pamoja na changamoto mbalimbali za masuala ya lishe ikiwemo eneo la afya ya mama na mtoto.

Akizungumza katika kikao hicho Mkuu wa wilaya ya Temeke Mhe. Sixtus Mapunda ameagiza kamati ya lishe kuhakikisha utafiti wa viashiria vya magonjwa yanayohusiana na lishe pamoja na chanjo kwa mama na mtoto ufanyike haraka ili kudhibiti na kumaliza kabisa magonjwa yatokanayo na lishe kwa mama na mtoto. Amesema

''Muda uliowekwa wa kuanza kutoa huduma ya chanjo kwa mama na  mtoto mpaka kufikia mwezi Mei, 2025 itakuwa mbali punguzeni ili kuwezesha huduma hii kufikiwa kwa haraka zaidi na itapendeza zaidi mkitengeneza misingi mizuri ya watu kujitokeza kwa wingi katika vituo mtakavyopanga''. Alisema Mhe.Sixtus Mapunda.

Kwa upande wake mratibu wa lishe bi. Happy Nkunda ameeleza lengo la kikao hicho ni kupitia viashiria kuanzia ngazi ya kata na ngazi ya halmashauri na kubainisha changamoto, mafanikio na kuweka mikakati ya kuboresha hali ya lishe ndani ya manispaa kwa kushirikiana na wadau na jamii husika.

"Tumeandaa kongamano la maadhimisho ya wiki ya magonjwa yasiyoambukiza ambapo tutahusisha elimu ya lishe,uchunguzi wa magonjwa kama shinikizo la damu,kisukari,tezi dume,saratani ya mlango wa kizazi na saratani ya matiti kuanzia Novemba 14-15 mwaka huu karibuni sana hapa hapa manispaa ya Temeke''.

Manispaa ya Temeke inaendelea kutekeleza kikamilifu mkataba wa lishe kuanzia ngazi ya kata kwa kushirikiana viongozi na wadau muhimu.