KAMATI YA LISHE TMK YAJADILI TAARIFA ZA UTEKELEZAJI

Posted on: January 23rd, 2025

Kamati ya Lishe ya Wilaya inayoundwa na Wajumbe kutoka Idara na Vitengo mbalimbali pamoja na wadau muhimu wa lishe leo Januari 23, 2025 imefanya kikao cha kujadili taarifa ya utekelezaji wa Mkataba wa lishe katika kipindi cha Robo ya Pili (Oktoba-Desemba) kwa Mwaka wa fedha 2024/2025.

Kamati imepokea taarifa za utekelezaji kutoka idara na vitengo ikiwa pamoja na kupanga Mikakati mbalimbali katika uimarishaji wa hali ya lishe wilayani Temeke.

Afisa lishe Manispaa ya Temeke Bi. Happy Nkunda amesema Temeke inaendelea kufanya vizuri kutokana na jitihada kubwa zinazofanywa katika kuelimisha jamii juu ya masuala mbalimbali ya lishe ikiwemo kuzingatia mtindo bora wa maisha, unyonyeshaji kwa Watoto wenye umri chini ya miezi sita, upimaji wa hali ya lishe kwa watoto, utoaji elimu kwa watoaji huduma katika vituo vha kutolea huduma za Afya, upatikanaji wa chakula mashuleni, elimu kwa wajawazito juu ya lishe bora, umuhimu wa kuhudhuria kliniki mapema na kupatiwa vidonge vya madini ya chuma na Asidi ya foliki (Fefo) ili  kujifungua watoto wenye afya njema.

Kikao hicho kimefanyika katika Ukumbi wa Iddy Nyundo Manispaa ya Temeke.