Kamati ya Mazingira Yafanya Ziara Kata ya Kijichi.

Posted on: April 21st, 2021

Wajumbe wa kamati ya Mazingira ya wilaya ya Temeke  wakiwa katika kikao kifupi kabla ya kuanza ziara ya ukaguzi wa maeneo yenye changamoto za kimazingira katika mitaa ya Misheni na Kijichi.Kikao hicho kimefanyika katika ofisi ya Mtendaji wa kata ya kijich.Ziara  imeandaliwa na asasi isiyo ya kiserikali ya Lawyer's Environment Action Team(LEAT) .Aliyesimama ni Meneja mradi  Bibi Teresia Fabian  akizungumza na kamati wakati wa kikao hicho.

Kamati ya mazingira wilaya ya Temeke kwa kushirikiana na asasi isiyokuwa ya kiserikali ya lawyer's Environment  Action Team (LEAT) wamefanya ziara katika mitaa miwili ya kata ya Kijichi ambayo ni  Misheni na Kijichi.Ziara hiyo imefanyika leo majira ya saa tano asubuhi.

Ziara hiyo ni maatokeo ya kikao cha kamati za mazingira Mkoa wa Dar es Salaam cha tarehe 15/04/2020 kilichoandaliwa na LEAT ambapo katika kikao hicho  LEAT ilipendekeza kufanyika kwa ziara,katika maeneo mbalimbali ya mkoa  huo kwa lengo la kuendelea kubaini changamoto za kimazingira zilizopo katika maeneo hayo na kuzitafutia ufumbuzi.

Akizungumza mara baada ya ziara hiyo ,Afisa Mazingira wa Manispaa ya Temeke bibi Fina Benard  amesema kwamba  katika ziara hiyo kamati imebaini changamoto ya kuwepo kwa taka ngumu katika maeneo waliyotembelea.

''Changamoto kubwa katika eneo la  Misheni ni taka ambazo zinazalishwa  na wafanyabiashara waliopo katika eneo hilo ,pamoja na baadhi ya wananchi wanaoishi jirani na eneo hilo,ambao nyakati za usiku hutoa taka majumbani na kuzipeleka katika eneo hilo.Uongozi kwa kushirikiana na wafanyabiashara hao wameshapata ufumbuzi wa changamoto hiyo ,mkandarasi amepatikana,taka hizo zinazolewa kila siku''.Alisema Fina.

Kuhusu mchango wa LEAT  katika utatuzi wa  changamoto za kimazingira wilayani Temeke,Fina  amesema ''LEAT wamefanya kazi kubwa sana,kwanza walianza kutoa elimu kwa watendaji wa kata na mitaa tofauti tofauti,wameshatupa elimu sisi maafisa mazingira,kama mjuavyo elimu haina mwisho,lakini pia baadhi ya wenyeviti wa mitaa,wamachinga,baba lishe na mama lishe wamepewa elimu juu ya utunzaji wa mazingira, na uhifadhi wa taka.Tunaomba  waendelee kutupa elimu, Kwa msaada wao LEAT ,pamoja na juhudi zinazofanywa na Manispaa, tunaamini kwamba ipo siku tutafika sehemu ambayo tunahitaji kufika.

Kwa upande wake  mwenyekiti wa mtaa wa Kijichi ndugu Mohamed Rajabu ameeleza kuhusu changamoto ya daraja la Kijichi ambapo  mvua zinaponyesha mchanga mwingi huletwa na maji katika eneo hilo,mfereji kujaa mchanga hadi kufikia usawa wa daraja,hali ambayo inasababisha usumbufu kwa wananchi.Mohamed Rajabu amesema kwamba serikali imejipanga kutatua kero hiyo  kupitia Mradi wa DMDP ,daraja hilo litajengwa mwakani.

Naye mwenyekiti wa mtaa wa Misheni  ndugu  Bakari Masasi amesema kwamba changamoto ya kimazingira iliyopo katika mtaa wake  ni ukusanyaji wa taka  katika kituo cha daladala cha Misheni.Kuhusu juhudi za serikali katika kutatua changamoto hiyo,Masasi amesema kwamba pamoja na eneo hilo kutokuwa rasmi kwa ukusanyaji wa taka,lakini uongozi wa mtaa pamoja na wafanyabiashara wa eneo hilo wameweka utaratibu kuhakikisha kwamba kila siku gari la taka linafika katika eneo hilo na kuzoa taka zote.

LEAT  imekuwa msaada mkubwa katika kuisaidia serikali kutatua changamoto za kimazingira,ziara hiyo ni muendelezo wa utekelezaji wa  kazi za mradi wa kulinda haki za kimazingira kwa wanawake,vijana, wasichana na jamii kwa ujumla kwa kuiwezesha jamii katika masuala ya kisheria,kutambua haki zao za kimazingira,na kuishi katika mazingira safi na salama,mradi ambao unatekelezwa  na LEAT kwa ufadhili wa shirika lisilo la kiserikali la 'Legal Services Facility'.