KAMATI YA SIASA MKOA WA DSM YAFURAHISHA UTEKELEZA WA MIRADI TEMEKE

Posted on: May 7th, 2025

Na: Sweetbetter Njige

Kamati ya siasa ya halmashauri kuu ya CCM mkoa wa Dar es salaam ikiongozwa na mwenyekiti wa chama ndugu Abbas Mtemvu imefanya ziara ya ukaguzi wa miradi ya maendeleo inayotekelezwa ndani ya manispaa ya Temeke.

Akizungumza katika ziara hiyo iliyolenga kuhakikisha ilani ya Chama cha Mapunduzi (CCM) inatekelezwa ndani ya manispaa ya Temeke kwa upande wa miradi ya maendeleo (miundombinu) mwenyekiti Mtemvu amefurahishwa na jitihada zinazofanywa na manispaa katika usimamizi na ubora wa miradi. Alisema

“Kama wasimamizi wa ilani ya Chama Cha Mapinduzi mkoa wa Dar es salaam, tunatoa pongezi za dhati kwa halmashauri ya Temeke na kwako mhe. mkuu wa mkoa kwa usimamizi mzuri. Shule kama hii haitaki maneno mengi kusema kwakua tunaona. Hakika mkoa wa Dar es salaam tumefanyiwa mambo mengi mazuri”

Kwa upande wake mkuu wa mkoa wa Dar es salaam mhe. Albert Chalamila amesema

“Lengo hasa la ziara hii ni kutembelea miradi iliyotekelezwa na Serikali ya awamu ya sita inayolenga kuhudumia Wananchi. Kwa mkoa wa Dar es salaam kama mnavyoona shule hii, tumekubaliana rasmi kutokana na ufinyu wa ardhi sasa tusiogope kujenga majengo kwenda juu na tutaenda hata kwa zaidi ya ghorofa 10 zenye kila kitu ndani (bweni,maabara, ofisi n.k) vyote kwenye jengo moja, mhe. Rais ametoa waraka maalum kupitia kwa mhe. Waziri Mchengerwa kila halmashauri ijenge majengo kama haya na atakuja kuzindua mwenyewe. Na kwa habari ya hapa mara baada ya ‘landscaping’ watoto wataanza kusoma hapa. Tunachipaswa kufanya sasa baada ya mhe. Rais kufanya haya yote ni kuhakikisha mwisho wa siku kila mtu anafanya kwa nafasi yake ili mtoto aweze kufaulu (walimu, wazazi, walezi, jamii na Wanafunzi wenyewe)”

Miongoni mwa miradi iliyotembelewa na kamati ya siasa ni ujenzi wa shule ya sekondari Mangaya iliyopo kata ya Mbagala, ujenzi wa hospitali wilaya iliyopo kata cha Chamazi na ujenzi wa kituo cha Polisi kata ya Toangoma.