KAMATI YA USEMI KUHAKIKISHA BILIONI 20 ZINAREJESHWA HALMASHAURI

Posted on: October 15th, 2022

Leo Oktoba 15,2022 kamati ya kudumu ya bunge ya Utawala na Serikali za Mitaa (USEMI) ikiongozwa na mwenyekiti ambaye ni mbunge wa jimbo la Temeke mheshimiwa Abdallah Chaurembo imefanya kikao cha majumuisho ambapo wajumbe wa kamati hiyo kwa pamoja wameazimia kuokoa shilingi Bilioni 20 zilizopotea kutoka kwenye mikopo ya  Wanawake,Vijana na watu wenye Ulemavu maarufu kama "mikopo chechefu" kutokana na wakopaji kutorejesha mikopo yao.

Akizungumza katika kikao hicho Mhe. Chaurembo alisema

"Ndani ya mwezi mmoja Ubungo wameweza kurudisha milioni 161, tunaamini asilimia kubwa ya fedha hizi zitarudi, Temeke nao wamefanya namna ya kurudisha vifaa vya kilimo vilivyotolewa kwa kikundi fulani na vinafanyiwa utaratibu mwingine na havitapoteza thamani, ile milioni 175 itarudishwa kwenye mfuko wa maendeleo ya Wanawake,Vijana na na Watu  wenye ulemavu, hivyo hivyo kwa Halmashauri zingine"

Aidha Mhe. Chaurembo alieleza kuwa Halmashauri zimeanzisha utaratibu wa kutuma message za kukumbusha 'Push Button' kila mwezi kwa wadaiwa ambapo itasaidia kuhamasisha wadaiwa kulipa madeni yao, na kusisitiza mikopo kutolewa kwa vikundi vyenye tija.

"Tumekuja na utaratibu wa 'Push button' tunaamini hautatumia gharama kubwa na utasaidia kuwakumbusha wadeni kufanya marejesho yao. Kwa mwaka huu, mikopo ikatolewe kwa vikundi vyenye tija, kwa mfano wenzetu hapa Ilala, wameanzisha kikundi cha lishe chenye tija na kipo 'committed', hii ni fursa kwa Halmashauri kuona na kujifunza lakini pia Wakurugenzi na Maafisa Maendeleo ya Jamii wajifunze hata wao wenyewe kwa wenyewe ili kubadilishana uzoefu, sio lazima tutoke nje ya Nchi, tunaweza kusaidiana wenyewe kwasababu wapo wanaofanya vizuri zaidi"

Aidha Mhe. Chaurembo amesisitiza kuwa fedha zote za Serikali zisimamiwe kwa makini kuhakikisha zinaenda kutimiza lengo lililokusudiwa na kuwasaidia Wananchi wanaostahili.

"Fedha zote za Serikali zilizoletwa zisimamiwe kwa makini kuhakikisha zinaleta tija, kamati yetu imedhamiria kumsaidia Mhe. Rais Samia Suluhu Hassan, tumeondoka na majina ya vikundi vyote chechefu tutaendelea kuvifuatilia kuhakikisha Bilioni 20 zinalipwa, niwahakikishie bilioni 68 zinazokwenda kutolewa mwaka huu zitakopeshwa kwa weledi na Watanzania watafaidika" alisisitiza Mhe. Chaurembo.

Kwa upande wake kaimu mkurugenzi Idara ya Serikali za Mitaa TAMISEMI Angelista Kihaga, ameishukuru kamati hiyo kwa kuwa na manufaa kwa jiji la Dar es Salaam.

Kamati ya USEMI ni kamati ya kudumu ya Bunge inayosimamia masuala mbalimbali ya Serikali za Mitaa, na inalenga kuhakikisha maendeleo yanapatikana na yanasimamiwa ili kuwa Endelevu kwa faida ya Taifa ambapo kwa sasa inasimamia mchakato wa kurejesha fedha za mikopo ya 10% ambazo hazijarejeshwa kwa mkoa wa  Dar es Salaam