Kamati za Mazingira Mkoa wa Dar es Salaam Zakutana

Posted on: September 3rd, 2021

Kamati za mazingira mkoa wa Dar es Salaam zimekutana katika hoteli ya Seashells Millennium. Mkutano huo ambao umeandaliwa na kuratibiwa na asasi isiyokuwa ya kiserikali ya Lawyer’s Environment Action Team’ (LEAT) umefanyika leo Septemba 03, 2021.

Mkutano wa leo ni matokeo ya ziara za timu hizo kutembelea maeneo  mbalimbali yenye changamoto za kimazingira  katika  wilaya zote za mkoa huo ,ambapo lengo la mkutano huo lilikuwa ni kufanya uwasilishaji kuhusu changamoto zilizobainika wakati wa ziara hizo, hatua zilizochukuliwa, pamoja na kutoa mapendekezo ya nini kifanyike  ili kutatua changamoto ambazo bado zinahitaji utatuzi.

Wakizungumza kwa nyakati tofauti baada ya uwasilishaji, wajumbe wa timu hizo wameishukuru LEAT, ambapo wamesema kwamba kupitia Asasi hiyo wameweza kuyafikia maeneo mbalimbali yenye changamoto za kimazingira,na kwamba kutokana na wao kuweza kufika, changamoto nyingi zimeweza kutatuliwa, na nyingine zinaendelea kutatuliwa.

Kadhalika wajumbe hao wamesema kwamba LEAT imewawezesha kupata elimu katika masuala mbalimbali yahusuyo mazingira,wameweza kujifunza mambo mengi ambayo wataendelea kuyatumia kuelimisha jamii zinazowazunguka.

Naye mratibu wa mradi huo wakili Teresia Fabiani amewashukuru wajumbe wote kwa kuweza kushiriki mkutano huo, amesema kwamba wajumbe hao ni kiungo muhimu katika  utekelezaji wa shughuli za mradi, na kwamba anaamini kwamba wataendelea kufanya kazi pamoja ,kwa ushirikiano huohuo.

Kwa takribani miaka 2 sasa asasi ya ‘Lawyer’s Environment Action Team’(LEAT) kwa ufadhili wa shirika lisilokuwa la kiserikali la Legal Services Facility,imekuwa ikitekeleza mradi wa kuwawezesha wanawake ,vijana na jamii kwa ujumla  katika mkoa wa Dar es Salaam kutambua haki yao ya kuishi katika mazingira safi na salama.Katika kutekeleza mradi huo, LEAT iliunda kamati  ya watu saba kutoka kila wilaya ,kwa kushirikiana na kamati hizo ambazo zinaundwa na wataalamu 4 kutoka Manispaa, Madiwani, watendaji wa Kata,watendaji wa Mitaa pamoja na wenyeviti wa Mitaa,imekuwa ikifanya shughuli mbalimbali ikiwemo kutembelea maeneo yenye changamoto za kimazingira, kuainisha changamoto zilizopo na kuzitafutia utatuzi, ambapo utatuzi huo unahusisha wadau mbalimbali kama; Manispaa, Uongozi wa Mkoa , NEMC na ofisi ya Makamu wa Rais Mazingira.