KAMPENI YA USAFI TEMEKE YAVUTIA WADAU

Posted on: September 30th, 2023

Na Shalua Mpanda, TMC

Jitihada za viongozi wa wilaya ya Temeke katika kampeni za usafi zinazofanyika mara kwa mara zimewagusa wadau mbalimbali na hatimaye kuiunga mkono Temeke katika kampeni hizo.

Akizungumza katika zoezi la usafi lililofanyika leo tarehe 30 Septemba, 2023, kwenye kata ya Miburani eneo la Temeke mwisho, Mkuu wa Wilaya Mhe. Mobhare Matinyi amesema kwamba karibu kata zote 23 za wilaya hiyo zimepata wageni rasmi kutoka kada na sehemu mbalimbali.

Mhe. Matinyi aliongeza zaidi kuwa kwa kuvutiwa na usafi wa mazingira wilayani humo, kampuni ya fedha ya Bayport imetoa miche ya miti 500 iliyopandwa tarehe 29 Septemba, 2023 wilayani humo wakati wa kuhitimisha awamu ya kwanza ya usafi ya mitaro na mifereji.

Mhe. Matinyi aliongeza zaidi: "Wakati tunazindua wiki ya kusafisha mitaro na mifereji, Waziri wa Nchi Ofisi ya Makamu wa Rais anayesimamia Muungano na Mazingira, Dkt. Selemani Jaffo, alikuja kutuunga mkono kwa sababu aliona tunafanya jambo jema na wana Temeke tuna mwamko."

Kabla ya hapo Mkuu wa Mkoa wa Dar es Salaam, Mhe. Albert Chalamila, alikuwa mgeni rasmi kwenye siku ya usafi duniani wilayani humo ambamo iliadhimishwa kwa kufanya usafi kwa wiki nzima huku akitoa wito kwa wengine kuiiga Temeke.

Naye Mwenyekiti wa Serikali ya Mtaa wa Miburani Bw. Ali Kiaka ametoa rai kwa wananchi wa maeneo hayo kuendelea kutunza mazingira na kuacha tabia ya kutupa taka kwenye mitaro na mifereji.