KAMPENI YA USAFI WA MWISHO WA MWEZI KUJA NA MASHINDANO KATA KWA KATA

Posted on: April 29th, 2023

Na: Sweetbetter Njige-TMC Habari

Mkuu wa wilaya ya Temeke Mheshimiwa Mwanahamisi Munkunda amesema wilaya ya Temeke imejipanga kuja na mashindano ya usafi ambapo kwa Kata itakayokuwa safi zaidi itapata zawadi ili kuhamasisha usafi.

Amezungumza hayo leo Aprili 29,2023 alipoongoza zoezi la usafi wa mwisho wa Mwezi katika kata ya Yombo Vituka  alisema

"Huku Vituka watu wamejipanga wanafanya usafi, watu wa hapa wana muamko sana,hapa tunatekeleza ilani ya Chama cha Mapinduzi (CCM). Mheshimiwa Mbunge tumejipanga tunataka kwenye jimbo lako huu upande uwe wa mfano,tutaanza mashindano ya kata, kata itakayofanya vizuri itapewa zawadi ili kuendelea kuleta hamasa ya usafi kwenye mitaa yetu"

Aidha Mhe. Mwanahamisi ametoa maelekezo kwa viongozi wa Kata na Mitaa kuhakikisha wanatunza mazingira kwa kufanya usafi na kupanda miti,alisema.

"Sambamba na kufanya usafi tunapaswa kutunza barabara zetu kwa kupanda miti, tuwafundishe jirani zetu , waje wajifunze usafi Yombo Vituka,natoa maelekezo kata hii, kila mtaa unawajibu wa kupanda miti elfu ishirini (20,000) kushoto na kulia mwa barabara, miti hiyo ikabidhiwe kwa Wananchi wenzetu wenye nyumba zilizopo pembezoni mwa barabara.Tunatamani mtu akija aione Yombo Vituka ya kijani"

"Niwapongeze Wananchi wenzangu wa kata ya Yombo Vituka kwa kazi nzuri ya usafi, mmemuonesha Mhe. Mkuu wa wilaya  ushirikiano mzuri, yeye ni muumini mzuri wa usafi, hii isiwe mwisho wa kufanya usafi, iwe ni kawaida yetu, Mtaa kwa Mtaa, Kata kwa Kata kila mwisho wa mwezi"

Aidha Mhe. Mwanahamisi ametoa wito kwa Wananchi kuchukua tahadhari dhidi ya magonjwa ya mlipuko ikiwemo kipindupindu kwa kuzingatia usafi wa mazingira na chakula.