KAMPENI YA UTOAJI CHANJ0 SURUA RUBELLA: DC MAPUNDA ATAKA USHIRIKISHWAJI VIONGOZI WA DINI NA VIKUNDI VYA KIJAMII

Posted on: February 13th, 2024

Na.Zaiko January

TMC Habari.

Mkuu wa wilaya ya Temeke Mhe. Sixtus Mapunda ameitaka kamati ya Huduma za Afya ya Msingi kuwashirikisha Viongozi wa Dini pamoja na vikundi mbalimbali vya kijamii katika uhamasishaji Wananchi, kuwatoa watoto wao kupata chanjo ya Surua Rubella wakati wa zoezi la Kitaifa la kampeni ya utoaji wa chanjo hiyo kwa watoto wenye umri chini ya miaka mitano(5) itakayofanyika Nchini kote mnamo February 15 - 18,2024.

Mhe. Mapunda ametoa maelekezo hayo leo Februari 13,2024 wakati wa kikao cha kamati ya Huduma za Afya ya Msingi kilichofanyika katika ukumbi wa mikutano Manisipaa ya Temeke (Iddi Nyundo).

Akizungumza katika kikao hiko mratibu wa huduma za chanjo manisipaa ya Temeke ndugu Jumanne Kagoda amesema chanjo hiyo itatolewa kwa watoto wa umri wa miezi 9 mpaka miezi 59 ili waweze kuwa na kinga imara.

"lengo letu katika manisipaa ya Temeke ni kuwafikia watoto zaidi ya 183,682, na tuna vituo 120, 98 ni vituo vinavyotoa huduma za afya, 22 ni vituo vya Serikali za Mitaa, ambapo Wananchi watapata huduma hiyo kuanzia siku ya tarehe 15 mpaka 18 ya mwezi huu"

Kufanikiwa kwa kampeni hiyo kutategemea mwamko na mtazamo chanya wa wazazi .Uongozi wa Manispaa ya Temeke unatoa rai kwa Wananchi kuunga mkono jitihada za Serikali za kuhakikisha kwamba Wananchi wake wanakuwa na Afya njema kwa kuwapeleka watoto wao kupata chanjo.