KATA ZOTE TEMEKE KUPATA BARABARA -MEYA MTINIKA

Posted on: March 14th, 2023

Na:Shalua Mpanda-TMC Habari.

Jumla ya kata 23 ndani ya manispaa ya Temeke zinatarajiwa kufikiwa na miradi mbalimbali ya ujenzi na uboreshaji wa barabara katika mwaka wa fedha 2022/23 na 2023/24.

Hayo yamebainishwa leo na mstahiki meya wa manispaa ya Temeke mheshimiwa Abdallah Mtinika mara baada ya kikao maalum cha Baraza la Madiwani lililokutana leo Machi 14,2023.

Katika kikao hicho maalum kilichokuwa na ajenda moja tu ya kujadili barabara, madiwani wa kwa kauli moja walipitisha bajeti hiyo ambayo katika baraza lililopita baadhi ya madiwani walitoa hoja za kutaka kikao maalum ili kujadili bajeti hiyo kutokana na umuhimu wake.

"Tumejadiliana kwa kina na waheshimiwa madiwani na tumehakikisha kwamba kata zote zinaguswa na miradi hii ya barabara.....tunaamini watu wataanza kuona mabadiliko ya barabara zetu hizi za mitaani".Alisema Mhe.Mtinika

Pia amempongeza Rais wa Jamhuri ya Muungano wa Tanzania Dkt.Samia Suluhu Hassan kwa kutoa kiasi kikubwa cha fedha ndani ya manispaa hii hasa katika uboreshaji wa miundombinu ya barabara na elimu.

Kwa upande wake meneja wa TARURA na mratibu wa Mradi wa Uboreshaji wa Jiji la Dar es salaam(DMDP) wilayani Temeke Injinia Paulo Mhere amesema miradi hiyo itatekelezwa kwa fedha za mifuko minne.

Ameitaja mifuko hiyo kuwa ni mapato yatokanayo na makusanyo ya ndani,fedha za tozo(za mafuta),Mfuko wa barabara(Road fund) pamoja na Mfuko wa Jimbo huku na amelishukuru Baraza hilo kwa kupitisha bajeti hiyo.