KILAKALA IMEJIPANGA KUWA MFANO WA KUIGWA

Posted on: January 29th, 2024

Na: Sweetbetter Njige

TMC Habari.

Diwani wa kata ya Kilakala mheshimiwa Amiri Bakari Salum ameongoza zoezi la usafi wa mwisho wa mwezi kwa mwezi Januari katika kata ya Kilakala eneo la barabara ya Mwinyi.

Mhe. Salum amesema lengo la kufanya usafi kila mwisho wa mwezi sio tu kuweka mazingira katika hali ya usafi, lakini pia kutunza miundombinu iliyojengwa na Serikali kwa gharama kubwa. Alisema

"Kilakala tumejipanga kuwa mfano wa kuigwa Temeke, tumeanza kwa kufanya usafi katika barabara zetu ambazo zimetekelezwa kwa gharama kubwa, tunahakikisha mitaro inakua safi, kuruhusu maji kupita vizuri hasa katika kipindi hiki cha mvua, kwa kufanya hivyo tunatunza mazingira na miundombinu kwa wakati mmoja"

Katika hatua nyingine Mhe. Salum amewapongeza wadau mbalimbali kwa kujitokeza kufanya usafi wa mwisho wa mwezi hususani jeshi la polisi, vikundi vya mbio za pole (jogging) wadau wa utunzaji wa mazingira na Wananchi kwa ujumla.

Kwa upande wake kamanda kutoka jeshi la polisi kituo polisi Chang'ombe Inspekta Meshack amesema jeshi la polisi linashiriki moja kwa moja na Wananchi kutunza mazingira ili kuiepusha jamii na magonjwa ya mlipuko. Amesema

"Tuko hapa ili kushirikiana na Wananchi katika suala zima la usafi kuhakikisha tupo salama. Lengo letu ni kushirikiana na Wananchi katika mambo mbalimbali sio tu Ulinzi na Usalama lakini pia Usafi".