KIPYENGA KIMELIA TEMEKE, SATURA ATOA MAELEKEZO YA UCHAGUZI WA SERIKALI ZA MITAA 2024

Posted on: September 27th, 2024

Na: Joanita Joseph

       TMC Habari.

Msimamizi wa Uchaguzi wa Serikali za Mitaa katika Halmashauri ya Manispaa ya Temeke Ndg. Jomaary Mrisho Satura leo Septemba 26, 2024 ametoa Maelekezo kuelekea Uchaguzi wa Serikali za mitaa unaotarajiwa kufanyika Novemba 27, 2024 hapa Nchini.

Ndg. Satura amesema kuwa Zoezi la Uandikishaji Wapiga kura litafanyika kuanzia Oktoba 11 hadi 20, 2024 katika Vituo vilivyopangwa hivyo basi Wakazi wote waliokidhi Vigezo vya kupiga kura wanahimizwa kushiriki Uchaguzi ili waweze kutumia haki yao ya Msingi ya kikatiba ya kupiga kura kuchagua Wagombea wanaowataka.

Ndg. Satura amesema kuwa Zoezi la uchukuaji na urejeshaji fomu za kugombea litafanyika kwa siku 7 kuanzia Novemba 1 hadi 7, 2024 katika ofisi za Wasimamizi wasaidizi wa Uchaguzi huku Nafasi zitakazogombewa ni Nafasi ya Mwenyekiti wa Mtaa pamoja Wajumbe wa Serikali ya Mtaa kundi Mchanganyiko (wanawake na wanaume) na Uteuzi wa Wagombea utafanyika Novemba 8, 2024.

Ndg. Satura amesema kuwa pingamizi kwa Wagombea zitatolewa kuanzia Novemba 8 hadi 9, 2024 na kutolewa uamuzi hadi Novemba 10, 2024 na Rufaa zote zitapokelewa kwa Mujibu wa Kanuni na uamuzi wa kamati ya rufaa utatolewa kuanzia Novemba 10 hadi 13 Mwaka huu.

Vilevile Ndg. Satura ameelekeza kuwa kampeni za Uchaguzi zinatarajia kuanza kuanzia Novemba 20 hadi 26 kuanzia saa 2 asubuhi hadi saa 12 jioni na Novemba 27, 2024 itakuwa siku ya Uchaguzi.

"Serikali za Mitaa, Sauti ya Wananchi, Jitokeze kushiriki Uchaguzi".