KITUO CHA AFYA MKONDOGWA CHAWEKEWA JIWE LA MSINGI

Posted on: April 24th, 2023

Na: Sweetbetter Njige- TMC Habari

Leo Aprili 24,2023 mkuu wa wilaya ya Temeke Mheshimiwa Mwanahamisi Munkunda ameweka jiwe la msingi katika kituo cha afya Mkondogwa kilichopo katika kata ya Chamazi wilaya ya Temeke kinachonjengwa kupitia mapato ya ndani ya Halmashauri.

Akiwa ameambatana na Meya wa manispaa ya Temeke Mhe. Abdallah Mtinika, mkurugenzi wa manispaa ndugu Elihuruma Mabelya, diwani wa kata hiyo Mhe. Gama na viongozi mbalimbali wa Chama na Serikali,Mhe. Mwanahamisi alisema viongozi waliopo Temeke ni mfano, na wanapaswa kuungwa mkono kutokana na utendaji wao, alisema

"Zamani haikua rahisi sana kufanya miradi kupitia mapato ya ndani, huu ni mradi mmoja kati ya vituo vya afya vitatu vilivyojengwa kwa mapato ya ndani katika mwaka huu wa fedha, hii inaonesha baada ya muda Wilaya, Kata na Mitaa itakua imeunganishwa na huduma za afya.Haya ni matunda yanayotokana na utulivu wa kisiasa na muungano wetu wa Tanganyika na  Zanzibar".

Kwa upande wake meya wa manispaa ya Temeke amesisitiza uzalendo, kujivunia maendeleo tunayoendelea kupata kama Taifa na kuthamini muungano hasa kwa vijana wadogo.

"Kizazi hiki kitambue Nchi yetu imetokana na muungano wa Tanganyika na Zanzibar,  tumetoka mbali. zamani huku kulikua na nini, lazima tujue Nchi ilikotoka na inakoelekea, Rais Samia Suluhu Hassan na Dkt. Hussein anafanya kazi kubwa sana, tusidanganywe na wasio wazalendo".

Naye mkurugenzi wa manispaa Ndg. Elihuruma Mabelya amesema Manispaa ya Temeke inaendelea kutekeleza maagizo ya Serikali hasa katika kutekeleza miradi ya afya kama ilivyo kipaumbele cha Serikali ya awamu ya sita.

Katika hatua nyingine diwani wa kata ya Chamazi Mhe. John Gama ameushukuru uongozi wa awamu ya sita chini ya Rais Samia Suluhu Hassan, Uongozi wa Manispaa na Baraza la Madiwani kwa kuendelea kusogeza huduma za Kijamii katika kata hiyo.

Manispaa ya Temeke kupitia mapato ya ndani inatekeleza ujenzi wa kituo cha afya Mkondogwa ambapo shilingi 520,961,500 zinatarajiwa kutumika kukamilisha mradi huo ambao umefikia 70% na utahudumia wakazi wa kata hiyo yenye jumla ya mitaa 9. Kituo hicho kinajumlisha jengo la wagonjwa wa nje, jengo la wazazi na nyumba ya mtumishi.