KITUO CHA JPG POLYCLINIC CHAPATA GARI YA KUBEBEA WAGONJWA

Posted on: April 2nd, 2024

Na: Joanita Joseph - TMC Habari

Kituo cha Jamii Partners Group (JPG) POLYCLINIC kilichopo Chang'ombe mtaa wa keko bora ambacho uwepo wake umewezeshwa na serikali ya awamu ya sita inayoongozwa na Mhe.Rais Dkt. Samia Suluhu Hassan kupitia mpango wa utoaji mikopo kutoka kwenye 10% ya mapato ya ndani ya halmashauri kwa wakina mama, vijana na watu wenye ulemavu kimeongeza gari la kubebea wagonjwa (Ambulance) ikiwa ni sehemu ya kuboresha upatikanaji wa huduma ya haraka ili kupunguza idadi ya vifo vitokanavyo na ukosefu wa huduma ya haraka.

Akizungumza akiwa kituoni hapo Daktari Thomas Ngerera, mwenyekiti wa kikundi cha Jamii partners group amesema dhamira yao kuu ni kuhakikisha wanalinda afya za wananchi huku akiwakaribisha wananchi kujitokeza katika kituo hicho kwa kuwa wana vifaa vya kisasa na wanatoa huduma bora za kibingwa.

"Sisi JPG Polyclinic tumedhamiria kulinda afya za wananchi na ni furaha kubwa sana kwetu kupata gari hili litakalowezesha huduma ya usafirishaji wagonjwa kwa haraka na kuokoa maisha yao, huduma hii ya dharula inapatikana kwa masaa 24 lakini pia ni standby ambulance hata kwenye matukio mbalimbali ya kimichezo, mikutano mbalimbali, hivyo tunaendelea kuwakaribisha wananchi kituoni hapa wapate huduma bora za kiafya" alisema Dkt. Ngerera.

Kituo hicho kinatoa huduma za vipimo, uchunguzi, na matibabu ikiwemo ya kibingwa pamoja na kliniki katika magonjwa mbalimbali.