KUELEKEA MIAKA 61 YA UHURU:TEMEKE KUKABILIANA NA MABADILIKO YA TABIA NCHI

Posted on: December 3rd, 2022

Na: Sweetbetter Njige

TMC Habari

Kuelekea madhimisho ya miaka 61 ya Uhuru,viongozi na watumishi wa Halmashauri ya Manispaa ya Temeke wakiongozwa na mwakilishi wa mkuu wa wilaya ya Temeke Mheshimiwa Ng'wilabuzu Ludigija, ambaye pia ni mkuu wa wilaya ya Ilala pamoja na katibu tawala (W) Bi Bupe Mwakibete wamefanya zoezi la usafi na upandaji wa miti katika shule ya sekondari Kibasila.

Akizungumza mara baada ya zoezi hilo Mhe. Ludigija alisema moja kati ya shughuli muhimu zilizopangwa kufanyika kuelekea madhimisho ya Uhuru, ni upandaji wa miti, kutokana na Dunia kushuhudia athari za mabadiliko ya Tabia Nchi.

"Kubwa zaidi tunafanya upandaji miti ili kuhakikisha tunatunza mazingira, lakini tumekumbana na mabadiliko ya "Tabia Nchi" katika Nchi yetu, na hasa mikoa hii ya Dar es Salaam na Pwani. Ninyi wenyewe ni mashahidi tulikua na mgao mkubwa wa maji, kwa kushirikiana na wataaalam wetu watusaidie kutambua miti inayosaidia kutunza maji na uoto wa asili, ili tuendelee kutunza na kulinda mazingira yetu"

Aidha Mhe. Ludigija amewataka wananchi wa Mkoa wa Dar es Salaam kuwa mstari wa mbele katika kupanda miti,kwani kufanya hivyo ni kutuma ujumbe  juu ya umuhimu wa utunzaji wa mazingira kwa Mikoa Mingine .

Kila mwaka katika maadhimisho ya Uhuru , Manispaa ya Temeke imekuwa na utaratibu wa kufanya shughuli mbalimbali za Kijamii ili kuwaleta Wananchi pamoja na kudumisha mshikamano, kwa kushirikiana katika utekelezaji wa ajenda za Kitaifa.