KUMBUKIZI YA KUZALIWA KWA RAIS SAMIA TEMEKE YAJIKITA KWENYE HUDUMA ZA AFYA

Posted on: January 27th, 2024

Na: Joanita Joseph - TMC Habari

Kila ifikapo Januari 27 kila mwaka, Rais wa Jamhuri ya Muungano wa Tanzania Mhe. Dkt. Samia Suluhu Hassan hukumbuka siku yake muhimu ya kuzaliwa.

Leo Januari 27, 2024 Halmashauri ya manispaa ya Temeke imeungana na Mheshimiwa Rais katika kusherehekea kumbukizi hiyo kwa kutoa huduma mbalimbali za kiafya kwa wananchi ikiwemo upimaji afya kwa magonjwa ya kuambukiza na yasiyoambukiza, kusajili na kutoa vyeti vya kuzaliwa kwa watoto wa umri chini ya miaka mitano, uchangiaji damu wa hiari pamoja na kutoa ushauri juu ya lishe na mtindo bora wa maisha.

Akizungumza wakati wa hotuba yake Mhe. Sixtus Mapunda, Mkuu wa wilaya ya Temeke ambaye alikuwa ni mgeni rasmi katika hafla hiyo, amepongeza uongozi wa manispaa kwa fikra na ubunifu katika kuadhimisha siku hiyo.

"Nimeambiwa mpaka sasa watu 53 wamejitokeza kuchangia damu, tumepata lita 21 za damu kwahiyo tuna uhakika sasa hivi wamama 21 tunaweza wapelekea damu lita moja moja wakapona! Mimi niwapongeze sana, hili jambo kubwa sana na hiyo ndio njia bora ya kuenzi siku ya kuzaliwa ya Mheshimiwa Rais." Alisema DC Mapunda

Kwa upande wake diwani wa kata ya mbagala kuu Mhe.Juma A Maanya amemtakia Mheshimiwa Rais afya njema yenye kumuwezesha kuongoza watanzania kwa lengo la kuhakikisha wanapata maendeleo.

"Kata ya Mbagala kuu pekee tumepata Bilioni 4 kwa ajili ya kuimarisha utoaji wa huduma za afya kwa kata hii, tunamshukuru sana na kumuombea afya njema" alisema Mhe. Maanya.

Ikumbukwe kuwa Mhe. Rais anawekeza nguvu kubwa katika sekta ya afya, kwa ajili ya kuokoa maisha ya Watanzania na kuhakikisha wananchi wanapata huduma bora.