''KUPAMBANA DHIDI YA UKATILI WA KIJINSIA, KUNAHITAJI ELIMU ZAIDI KULIKO NGUVU'' RPC MULALE

Posted on: December 5th, 2023

Na:Zaiko January -TMC

Mbunge wa Jimbo la Temeke mheshimiwa Dorothy Kilave akiwa na baadhi ya viongozi wa jeshi la polisi mkoa wa kipolisi Temeke,ameshiriki katika ufunguzi wa siku 16 za kupinga ukatili wa kijinsia.

Ufunguzi huo umefanyika leo Desemba 05,2023 katika viwanja vya Mwembeyanga.

Akizungumza katika ufunguzi huo uliombatana na uzinduzi wa kampeni ya kupinga ukatili wa kijinsia inayojulikana kama"WEKEZA KUZUIA UKATILI WA KIJINSIA"Mhe.Kilave amesema, kupinga ukatili wa kijinsia ni zoezi la Wananchi wote bila kujali kwamba umemtokea nani, kwa kuwa wote ni wahanga.

"Nashukuru sana kwa uanzishwaji wa madawati ya Jinsia, kweli tumeanza vizuri, na mimi pia nimekuwa mhimili mzuri kupinga ukatili huu katika jamii yangu".Alisema Mbunge huyo

Kwa upande wake mkuu wa Polisi mkoa wa kipolisi Temeke (RPC) John Mulale amewataka watoto kuwa wepesi kutoa taarifa juu ya matukio yote ya kikatili yanayotokea majumbani.

"Kupambana dhidi ya ukatili wa kijinsia kunahitaji elimu zaidi kuliko nguvu, ndio maana tunatoa elimu kwa watoto wa shule,kwa sababu elimu ni silaha tosha kwa Jamii yote inayotuzunguka".Alisema RPC Mulale

Aidha baadhi ya wanafunzi walioshiriki ufunguzi huo walisema:

"Tumejifunza namna ya kupambana na ukatili wa kijinsia unaotokea majumbani kwetu" alisema mwanafunzi Hassani Haji .

"Tumejifunza aina za ukatili wa kijinsia na tumejua namba za kupiga kama kuna tukio la ukatili wa kijinsia ambazo ni 116" Alisema mwanafunzi Shakira Abdallah

Zoezi hili litadumu kwa siku 16 ,ambapo katika siku hizo zote elimu juu ya ukatili wa kijinsia itatolewa.