LEAT YATUA KILUNGULE

Posted on: August 24th, 2021

Maafisa kutoka katika asasi isiyokuwa ya Kiserikali ya Wanasheri Watetezi wa Mazingira (LEAT) kwa kushirikiana na kamati ya mazingira wilaya ya Temeke imefanya ziara ya ukaguzi wa Mazingira katika kata ya Kilungule.Ziara hiyo imefanyika leo Agost 24,2021 majira ya saa tano asubuhi.

Katika ziara hiyo kamati pamoja na maafisa hao walitembelea maeneo mbalimbali yenye changamoto za kimazingira likiwemo eneo la makaburi lililopo katika mtaa wa Kilungule ambapo changamoto inayolikabili eneo hilo ni mmomonyoko wa udongo ambao umesababisha sehemu  ya makaburi hayo kumegeka, hivyo  baadhi ya makaburi kupotea.

Akizungumza mara baada ya kuupokea Ugeni huo diwani wa kata hiyo Mheshimiwa Said Fella amesema kwamba kata ya Kilungule ina changamoto kubwa za kimazingira ,na moja ya sababu kubwa ya uwepo wa  changamoto hizo ni jiografia ya kata hiyo,ambapo imezungukwa na mabonde.Amesema  anatamani kuona matokeo ya ziara hiyo,kwamba yatapunguza changamoto zilizopo,ambazo kutokana na asili yake,utatuzi wake unahitaji fedha nyingi.

Aidha mtendaji wa kata hiyo bibi Edith Kwai amesema kwamba msimu wa mvua nyingi maji kutoka maeneo mbalimbali ya wilaya ya Temeke hupita katika eneo hilo,na kwa sababu  sehemu kubwa imezungukwa na mabonde,sehemu kubwa ya eneo hilo imekuwa ikikumbwa na tatizo la mmomonyoko wa ardhi ,ambapo uongozi wa kata umefanya jitihada mbalimbali kupunguza athari zinazotokana na  hali hiyo,lakini kwa kiasi kikubwa bado ni   changamoto.

 LEAT kupitia mradi wake unaolenga kuwawezesha wakazi wa jiji la Dar es Salaam kutambua haki yao ya kuishi katika mazingira safi na salama, iliunda kamati za watu 7 kwa kila wilaya , maafisa  wa LEAT kwa kushirikiana na kamati hizo wamekuwa wakifanya ziara kutembelea maeneo mbalimbali yenye changamoto za kimazingira, kuangalia changamoto zilizopo na kuzitafutia ufumbuzi , ziara ya leo ni muendelezo wa ziara hizo,ambapo baada ya kuhitimisha kamati zote zitakutana  kujadili kwa pamoja na kutafuta masuluhisho.