MKURUGENZI TEMEKE AUNGANA NA JESHI LA POLISI KUMWAGA ZEGE LUMO SEKONDARI

Posted on: January 23rd, 2023

Na: Sweetbetter Njige

TMC Habari

Januari 23,2023 mkurugenzi wa manispaa ya Temeke ndugu Elihuruma Mabelya ameungana na jeshi la polisi mkoa wa kipolisi Temeke  kumwaga zege ikiwa ni hatua za awali za ujenzi wa madarasa ya ghorofa yanayojengwa katika shule ya sekondari Lumo iliyopo katika kata ya Yombo Vituka.

Akizungumza katika zoezi hilo mkurugenzi Mabelya amelishukuru Jeshi hilo kwa kufanya maamuzi ya kushirikiana na jamii katika ujenzi wa madarasa hayo,alisema.

"Jeshi la polisi limetoa mchango wa nguvu kazi katika ujenzi wa madarasa haya.Tukio hili ni la kuigwa, sisi kama Halmashauri tumelipokea kwa mikono miwili, hii ni dhana ya kumuunga mkono Mheshimiwa Rais Samia Suluhu Hassan kwa vitendo,hii ndio maana ya 'Kazi Iendelee'

Aidha mkurugenzi Mabelya ametoa wito kwa taasisi na mashirika mbalimbali kuunga mkono jitihada za Serikali kushiriki katika shughuli za kijamii hususani katika shughuli za kuboresha sekta ya elimu.

"Niombe mashirika na taasisi mbalimbali katika halmashauri yetu, kujitokeza kwa wingi kushiriki na kurudisha kwa jamii kwa kutoa sehemu ya faida yao au nguvu kazi ili kumuunga mkono mheshimiwa Rais hasa katika kipindi hiki anachojitoa kuwekeza katika sekta ya elimu, niwaombe tuige mfano huu uliooneshwa na Jeshi la polisi"

Kwa upande wake ACP John Malulu ameeleza furaha yake katika kushiriki zoezi hilo kama Maaskari na Wazazi.

"Tumekuja hapa kuunga mkono kazi nzuri ya Serikali yetu katika kuhakikisha watoto wa Temeke wanapata mahali pa kusoma, tutambue askari wa Temeke ni sehemu ya wana Temeke, tumeona ni muhimu kuja kuchangia nguvu kazi  za mikono hapa kwakua watoto wakielimika watapata maarifa ya kufanya shughuli zao maalumu za kujitegemea na tutaondoa uhalifu"

Manispaa ya Temeke inatekeleza mradi wa vyumba 32 vya madarasa vinavyojengwa kwa mtindo wa ghorofa katika Shule ya Sekondari Lumo ambapo kwa sasa ujenzi upo katika hatua za mwanzo na unatarajiwa kukamilika mapema mwezi Machi,2023.