MAADHIMISHO YA MIAKA 45 YA CCM WILAYA YA TEMEKE YAFANYIKA KIBURUGWA

Posted on: February 3rd, 2022

MAADHIMISHO YA MIAKA 45 YA CCM WILAYA YA TEMEKE, YALIYO FANYIKA KATA YA KIBURUGWA .

Maadhimisho hayo yalianza saa mbili kamili kwa matembezi ya mshikamano,kutoka barabara kuu ya Mbagala hadi ofisi za Kata ya Kiburugwa zilipo zilipofanyika shamra shamra za maadhimisho hayo.

Matembezi hayo yaliongozwa na  Katibu wa CCM Mkoa wa Dar es Salaam,  Adamu Ngarawa akimwakilisha mgeni Rasmi Mwenyekiti wa CCM Mkoa Mama Kate Kamba, Mwenyekiti wa CCM, Temeke Almishi Hazal, Katibu Kitte Adamu Mfilinge.

Pia Mkuu wa Wilaya Jokate Mwegelo ni moja ya viongozi walio shiriki katika maadhimisho hayo.

 Maadhimisho hayo yalipambwa kwa burudani kutoka kwa wasanii mbalimbali wakiongozwa na Msagasumu, vikundi vya taarabu na ngoma za asili.

Awali vijana wa chipukizi walimkabdhi Katibu  wa Chama Cha Mapinduzi (CCM), Mkoa wa Dar es Salaam, Adamu Ngarawa Picha ya Rais Samia Suluhu Hassan, Hayati Mwalimu Julias Nyerere, na bendera ya CCM naya Tanzania.

Katika hotuba yake Katibu Adamu Ngarawa  aliipongeza Wilaya ya  Temeke kwa maadhimisho hayo mazuri ya miaka 45 ya kuzaliwa CCM.

Pia aliwapongeza viongozi wa Temeke kwa kusimamia vyema maendeleo makubwa katika Wilaya  hiyo, ikiwemo ujenzi wa miundo mbinu mbalimbali ya elimu, afya na barabara akitolea mfano kituo cha afya cha Buza.

Katibu Adamu Ngarawa alisema katika kuadhimisha  miaka 45 ya  CCM, Tanzania inajivunia mafanikio makubwa ya miundombinu bora ya elimu, iliyojengwa na  Rais Samia Suluhu Hassan kwa muda mfupi alioingia madarakani.

Alisema kwa kazi kubwa iliyofanywa na Rais Samia ya kujenga miundo mbinu, watahakikisha wanasimamia vyema maendeleo ya elimu ilikuongeza ufaulu kwa shule za Serikali na kufuta zero.

Alisema vyumba vya madarasa vilivyojengwa na Rais Samia vimeweke rekodi kwa ubora, hivyo hawatavumilia mzazi asiyepeleka mtoto wake shule kwa kuwa madarasa yapo yakutosha.

" Niwatake mabalozi wa nyumba kumi kuhakikisha wanakagua kila nyumba, kuona kama kuna mzazi yeyote ambaye hakumpeleka mtoto wake shule aliyefaulu ili achukuliwe hatua," alisisitiza.

Katibu Adamu Ngarawa alisema watoto kutopelekwa  shule ni chanzo cha kujiingiza katika vitendo vya uharifu ikiwemo ukabaji, hivyo wazazi lazima wahakikishe watoto wao wote wanapata haki yao ya kieleimu.

Alisema watoto hao wakipata elimu watakuwa msaada mkubwa kwa jamii katika taaluma mbalimbali,ikiwemo uwalimu, utabibu na viongozi katika nyadhifa mbalimbali.

Akizungumzia uchaguzi wa Chama, aliwataka wanachama kuendelea na zoezi la kujisajiri kwa njia ya kielektroniki matawini.

Pia aliwaagiza viongozi wa Temeke kushirikiana ilikuongeza vitendea kazi simu janja kwaajili ya kurahisisha zoezi la kusajiri wanachama.

Alisema wao kama viongozi wamejipanga vizuri kuhakikisha uchaguzi huo unakuwa wa haki kwa kila mmoja, wanapinga rushwa na upendeleo, bali kila mmoja atachaguliwa kwa sita zake.

Kwa upande wake Mwenyekiti wa CCM, Wilaya ya Temeke, Almishi Hazali alisema alimpongeza Rais Samia kwa kutoa fedha nyingi za maendeleo katika Wilaya hiyo, ambazo zimejenga miundo mbinu mingi ya elimu na afya.

" Tunazidi kufanya kazi kwa juhudi ikiwa nisehemu ya kumuunga Rais Samia mkono katika utekelezaji wa miradi ya maendeleo inayoinua uchumi wa kila mtanzania," alisema.

Naye Mkuu wa Wilaya Jokate Mwegelo alisema wataendelea kudumisha ushirikiano ili kuijenga Temeke mpya ya mfano katika Wilaya zote za Dar es Salamaam.

" Tunatambua pamoja na mambo makubwa yanayofanywa na Rais Samia katika Wilaya yetu, bado zipo changamoto ndogondogo hivyo tutaendelea kushirikiana na viongozi wenzangu ilikuzitatua kwa wakati," alisema.

Pia Jokate alisema wataendelea kujenga na mpango wa kujenga shule za Sekondari katika kata sita ambazo hazijajengewa shule hizo.

Naye Katibu wa CCM, Wilaya hiyo Kitte Mfilinge aliwapongeza viongozi na wanachama kwa kujitokeza katika maadhimisho hayo ya wilaya, nakuwaahidi utekelezaji mzuri wa ilani ya Chama.

Katibu Kite alisema Mambo mengi yanazidi kufanyika katika Wilaya hiyo ikiwemo vijana kupewa mikopo ya asilimia kumi isiyo na riba na kuboresha mifumo ya elimu na miundo mbinu.

" Sisi viongozi wa chama tuko imara kuendeleza jitihada na maono ya Rais Samia Suluhu Hassan katika kuwatumikia watanzania wote hasa wanatemeke," alisema Kite.