Madiwani Temeke Waitaka Serikali Kuweka Mkazo kwenye viwanda vya Zamani

Posted on: May 31st, 2019

Naibu Mstahiki Meya wa halmashauri ya manispaa ya Temeke  Mhe. Juma Rajab Mkenga akizungumza wakati wa ziara ya madiwani  kutembelea viwanda.

Wahe. madiwani pamoja na wakuu wa idara na vitengo mbalimbali vya halmashauri ya manispaa ya Temeke  wakiwa katika ziara ya kutembelea viwanda .

Wahe. madiwani wa manispaa ya Temeke wakisikiliza maelezo  kuhusu namna uzalishaji  vilainishi unavyofanyika katika kiwanda  cha General Petroleum Ltd (GP).

Wafanyakazi wa kiwanda cha General petroleum (GP) wakiwa katika hatua ya kuweka vilainishi katika vifungashio.

..................HABARI KAMILI...................

Naibu Mstahiki Meya wa halmashauri ya manispaa ya Temeke Mhe. Juma Rajab Mkenga  ameitaka serikari  kuweka mkazo mkubwa kwenye viwanda vya zamani ambavyo vinaendelea kufanya uzalishaji  ili ajira zinazotolewa na viwanda hivyo ziendelee kulindwa.Mh. Mkenga ameyasema hayo mapema leo Ijumaa  wakati wa ziara ya Waheshimiwa madiwani kutembelea viwanda.

Akizungumza katika mahojiano mafupi   Mhe Mkenga anasema''Sisi tunafanya ziara kutembelea viwanda, lakini hatutembelei  kama watendaji wa serikali,  tunaangalia jinsi viwanda vinavyofanya kazi,tuone je uwepo wa viwanda hivi unatimiza malengo yaliyokusudiwa ya kutupeleka kwenye uchumi wa kati?Je viwanda hivi vinatoa ajira kiasi gani kwa wananchi wetu?Kwa sababu sera ya Mhe. Rais ni ujenzi  wa viwanda,kukuza uchumi wa nchi kupitia viwanda.Sasa tunaanzisha viwanda vipya,je viwanda vya zamani hali yake ikoje?Je vinafanya kazi? Je bado vinauwezo wa kujiendesha kwa faida.Je upo uhakika wa ajira endelevu  katika viwanda hivyo?''.

Mhe. Mkenga amesema  nia hasa ya ziara hiyo ni kutaka kujua  matatizo yanayowakabili  wamiliki wa viwanda vya zamani , waishauri serikali iyashughulikie,ili  matatizo hayo yasiendelee kujitokeza kwenye viwanda vipya vinavyoendelea kuanzishwa.Amesema wao kama madiwani wanawajibika kuiambia serikali  kuhusu  matatizo  yanayowakabili wawekezaji katika sekta ya viwanda.

Naye diwani wa kata ya Kilungule Mhe. Said Hassan Fella amesema kwamba katika ziara hiyo  wanakutana na wamiliki wa viwanda kuzungumza nao ili kubaini changamoto zao,kadhalika wafanyakazi wa viwanda hivyo .Na katika kuhakikisha kwamba changamoto zitakazobainika zitafanyiwa kazi, wameambatana na watendaji ambao ni wakuu wa idara mbalimbali za manispaa ili watakapokuwa wanakaa  katika kamati zao,  na katika baraza, wakizungumza kuhusu changamoto za viwanda wawe wanazungumza lugha moja. Mhe. Fella pia amesema kwamba lengo la ziara hiyo ni kuangalia kuhusu ushirikiano baina ya viwanda hivyo na manispaa hususani kwenye kulipa tozo za manispaa, kama zinalipwa kwa wakati, na kama kuna changamoto zozote zinazotokana na tozo hizo.

Aidha diwani wa kata ya Mbagala kuu Mhe. Shabani Othman Abubakari amesema kwamba wao kama madiwani wameamua kutembelea viwanda kwa sababu viwanda ndio sera inayotekelezwa sasa na serikali ya awamu ya tano.Vile vile kwa kutembelea viwanda wameona jinsi viwanda vinavyofanya kazi,Wamefahamu changamoto zilizopo viwandani,hivyo baada ya ziara hiyo watakaa wajadili ni namna gani ya kuwasaidia wamiliki wa viwanda hivyo kutatua changamoto  kwa sababu  wamiliki hao wanalipa kodi,wakipata hasara hawataweza kujiendesha,hawatalipa kodi, manispaa itakosa gawilo lake linalotokana na tozo.Si hayo tu ,lakini pia kuangalia ni kwa namna gani manispaa inaweza kuingia ubia katika baadhi ya viwanda,ili iweze kupata mapato makubwa zaidi ,kuliko inavyopata sasa .

Katika hatua nyingine wamiliki wa viwanda vilivyotembelewa wameeleza changamoto wanazokabiliana nazo katika uendeshaji wa viwanda vyao,lakini pia hawakusita kueleza kuhusu ushirikiano wanaoupata kwa mkurugenzi pamoja na Mhe. Mstahiki Meya pale wanapowaeleza  kuhusu changamoto hizo.

Katika ziara hiyo ya siku tatu ambayo imehitimishwa leo,Waheshimiwa madiwani wametembelea viwanda mbalimbali vilivyopo ndani ya manispaa ya Temeke vikiwemo kiwanda cha Berger Tanzania Limited ambao ni wazalishaji wa rangi na kiwanda cha  kutengeneza vilainishi  cha General Petroliam Limited(GP).

.............MWISHO...................