MADIWANI TEMEKE WAPEWA MAFUNZO KUHUSU USIMAMIZI WA MIRADI

Posted on: May 4th, 2021

Mhe Mstahiki Meya Abdallah Mtinika akiongea wakati wa mafunzo katika ukumbi wa Iddy Nyundo.

Mstahiki Meya wa halmashauri ya manispaa ya Temeke Mheshimiwa Abdalah Mtinika amefungua mafunzo kuhusu miradi ya maendeleo.

Mafunzo hayo  ya siku tatu yanafanyika katika ukumbi wa manispaa ya Temeke ujulikanao kama Iddi Nyundo,huku lengo likiwa ni  kuwajengea Madiwani uelewa kuhusu miradi ,uendeshaji na usimamizi wa miradi hususani mradi wa uendelezaji wa Mkoa wa Dar es Salaam(DMDP).

Sambamba na  kutambua vipengele maalum ikiwa ni pamoja na wajibu katika kuongoza na majukumu ya mradi,upangaji ,usimamizi na ufuatiliaji.Ushirikishwaji ikiwa ni pamoja na udhibiti na utambuzi wa viashiria vya hatari ya kukwama.

Akizungumza wakati wa hotuba yake ya ufunguzi Mhe. Mtinika ameishukuru menejimenti kwa kuandaa mafunzo hayo.

Mhe.Mtinika amesisitiza juu ya umuhimu wa mafunzo  hayo kwa Madiwani "Mafunzo haya ni muhimu sana kwetu,yatatujengea uwezo na wigo mpana wa kuyaelewa mambo  yote yanayohusu miradi ya DMDP.

Mhe. Mtinika amesisitiza  kuhusu ushiriki wa  Madiwani  katika siku zote za semina hiyo ambapo amesema" Tumekuwa na kiu siku nyingi ya kutaka kuyajua mengi kuhusu mradi  huu,sasa niwaombe mzitumie siku hizi tatu za mafunzo haya vizuri,ili tukitoka hapa kila mmoja awe na uelewa wa kutosha kuhusu mradi wa DMDP"

Nao madiwani walipohojiwa kwa nyakati tofauti  wamesema mafunzo hayo ni muhimu sana kwao, kama wasimamizi wa mradi na kwamba wanaamini baada ya  mafunzo hayo watakuwa na uelewa wa kutosha.

Mafunzo hayo ya siku 3 yanatolewa na waratibu wa DMDP ambao ni TARURA ambapo  mawasilisho ya leo siku ya kwanza,  yamefanywa na Mhandisi Laurent Kyombo na Mhandisi Kawawa.Aidha yanatarajiwa kufungwa May 05,2021.