Maelezo ya Janga la moto jengo dogo la afya Temeke

Posted on: April 22nd, 2020

MSTAHIKI MEYA MHE. CHAUREMBO AELEZEA JANGA LA MOTO  KATIKA JENGO DOGO LA AFYA TEMEKE .

Mstahiki Meya wa Manispaa ya Temeke  Mhe Abdallah Chaurembo leo ametoa maelezo kwa umma kufuatia janga la moto lililotokea jana tarehe 21/04/2020   katika moja ya jengo dogo la Idara ya Afya Manispaa ya Temeke Jijini Dar es Saalam.

Akiongea ofisini kwake mbele ya waandishi wa Habari Mstahiki Meya amesema  "Jana kulitokea na kadhia ya janga la moto katika jengo letu dogo la idara ya afya ambalo lina ofisi tatu(3) na stoo mbili(2) , katika ofisi zote tatu moja imeungua mbili ziko salama na stoo imeungua moja nyingine iko katika hali nzuri".

Mstahiki meya Mhe Abdallah Chaurembo akitoa maelezo ya janga la moto ofisini kwake Manispaa ya Temeke makao makuu,

Ameeleza kuwa  chanzo cha moto huo hadi sasa hakijajulikana lakini viko viashiria ambavyo vinadhaniwa  kuwa ndio chanzo cha moto huo.Viashiria hivyo ni aina ya vitu  vilivyokuwa vinahifadhiwa katika stoo ambavyo vingi vilikuwa ni "skrepa" kwa maana ya vifaa vilivyokwisha kutumika.

Aidha vifaa vinavyofahamika ambvyo vilikuwepo ni "drum" 5 za chlorine kila moja ilikuwa na uzito wa Kg 40, pump za aina mbili, "motoride pumb" 2 na "hand pump" 1 hizo ni nzima, na pump mbovu zilikuwa ni "motoride pump" 6 na "hand pump 32".

Pia kama mnavyofahamu kwa taratibu za Serikali vifaa vilivyokwishatumika huwa vinahifadhiwa hadi pale taratibu zingine zinapofanyika kwa maana hiyo pia kulikuwa na matairi ya magari yaliyokwishatumika, kulikuwa na vitabu vya zamani,majaba makubwa mapya, ndoo za lita 20 zilikuwa 55 na ndoo lita 10 zipatazo 74 ambazo tulinunua na nyingine tulizopewa na wadau. Lengo hasa la vifaa hivyo ilikuwa ni kukabiliana na ugonjwa wa COVID 19 kuwawezesha wananchi kupata vifaa vya maji tiririka kwa ajili ya  kunawia mikono, kwa bahati nzuri baadhi tulishapeleka katika kila kata na zilizobaki ndio hizo zimeungua.

Katika jengo hilo hakukuwa na vifaa kama barakoa au hand sanitizer hizo zilikuwa katika ofisi zingine na tunaendelea kama kawaida na mapambano dhidi ya COVID 19. Kwa upande wa hasara iliyotokea mpaka sasa thamani halisi ya vifaa vilivyoungua haijajulikana na chanzo cha moto huo hakijajulikana wataalam wanaendelea na uchunguzi.

Baadhi ya picha ikionyesha athari ya janga la moto katika ofisi ndogo ya afya Manispaa ya Temeke,

Mwisho Mstahiki Meya amewataka wananchi kuendelea kuchukua tahadhari juu ya janga la  ugonjwa hatari wa Corona, Aidha Manispaa inaendelea kuchukua tahadhari ikiwemo kutoa elimu na kuwasaidia wananchi katika maeneo mbalimbali kuhakikisha kuna vifaa vya kuwekea maji tiririka ili kupambana na kuenea kwa maambukizi ya COVID 19.