MAJIKO YA GESI 800 YATOLEWA BURE TEMEKE

Posted on: December 13th, 2024

Na: Sweetbetter Njige

       TMC Habari

Katika kuunga mkono jitihada za kinara wa ajenda ya nishati safi ya kupikia Nchini na barani Afrika mheshimiwa Rais Samia Suluhu Hassan,   mstahiki meya wa manispaa ya Temeke mhe. Abdallah Mtinika ameongoza zoezi la ugawaji wa majiko ya gesi 800 bure kwa wakazi wa manispaa ya Temeke.

Akiongoza zoezi hilo mheshimiwa Mtinika ameeleza umuhimu wa matumizi ya nishati safi ya kupikia kwa Mwananchi mmoja mmoja na taifa kwa ujumla huku akiweka msisitizo mkubwa katika kutunza mazingira na kukabiliana na mabadiliko ya tabia Nchi.

Aidha mhe. Mtinika ameeleza kuwa manispaa ya Temeke imejipanga kumuunga mkono mhe. Rais kwa kuweka mpango wa matumizi ya nishati safi.

"Mheshimiwa Rais anayo nia njema na maono ya kuleta mabadiliko kwa mazingira yetu na kwetu binafsi, mama zetu wameumwa macho, vifua, mapafu kwasababu ya mkaa na kuni. Dunia imebadilika kimazingira kutokana na uchomaji wa mikaa (ukataji miti kiholela) maisha ya sasa yamebadilika gesi sio anasa tena ni hitaji muhimu na tupo hapa kufanikisha hilo kwa ajili yetu na mazingira yetu

Sisi kama halmashauri tumetoa pesa kununua majiko 800 kwa mwaka huu wa fedha lakini bado tutaendelea kumuunga mkono Rais wetu kwa kuweka utaratibu sahihi wa kufikia matumizi ya nishati safi ya kupikia kwa 100%".

Kwa upande wake afisa maendeleo ya jamii na mratibu wa  uwezeshaji Wananchi kiuchumi bi. Glory Magushani amesema lengo kuu la ugawaji wa majiko hayo ni kuhamasisha makundi mbalimbali katika jamii hususani baba na mama lishe kutoka masoko mbalimbali kutumia nishati safi ya kupikia.

Kati ya makundi ya jamii yaliyopatiwa majiko ya gesi ni pamoja na kundi la walengwa wa TASAF, watu wanaoishi na VVU, watu wenye ulemavu, baba na mama lishe kutoka masoko mbalimbali, jukwaa la Wanawake wilaya ya Temeke.