Makamu wa Rais wa Benki ya Dunia aleta neema TASAF.

Posted on: November 16th, 2018

Mpango wa kunusuru kaya masikini katika mtaa wa Mamboleo B kata ya Sandali, ni moja ya mpango wa kuziwezesha kaya masikini sana kuongeza kipato, fursa na uwezo wa kugharamia mahitaji ya msingi, pia kuwekeza kwenye rasilimali watu  kwa kuwapa ruzuku ya masharti kwa Wananchi hususan kwa watoto wanaotakiwa kwenda shule na wanaotakiwa kuhudhuria kliniki.

Halmashauri ya Temeke kupitia mratibu wa TASAF Bibi Tatu, alisema wamewezesha na kuwasaidia walengwa kupitia pesa wanazolipwa kuweka akiba,kukopeshana na kuanzisha biashara mbalimbali ambazo zitawasaidia kujikwamua kimaisha na kuelezea mpango huu ulioanzishwa rasmi mwaka 2015.

Nae mkurugenzi wa Manispaa ya Temeke ndg,Joel  Mwakabibi aliwaelezea wageni kwamba serikali ya awamu ya tano ya Jamuhuri ya Muungano wa Tanzania imejikita na kujizatiti kupunguza/kuondoa umasikini kwa watu wake kwa kujenga nchi ya viwanda.

“Nimefurahishwa na walengwa wa mpango wa kunusuru kaya masikini,wameanza kwa nguvu na staili ya aina yake  ya kuanzisha viwanda vidogovidogo ambavyo vinaongeza kipato cha kaya zilizo kwenye mpango na hata ambazo hazipo kwenye mpango”alisema

Sambamba na hilo amezisifu kaya ambazo hazipo kwenye mpango kwakuwa zimepata ajira na huduma toka kwa kaya hizi ambazo ziliitwa kaya masikini kabla ya kuanza kwa mpango huu.

Akimkaribisha Makamu wa Rais wa Benki ya Dunia , kwa Kanda ya Afrika alisema kwa sasa TASAF imepanua wigo na kwa awamu ya tatu kila kijiji kitapewa ruzuku kama motisha ili kuhakikisha tunapunguza umasikini.

“Huwezi kutokomeza umasikini  kwa kutoa ama kugawa fedha bali kwa kujishughulisha ili kujikwamua na umasikini”alisema

Mratibu wa TASAF wa Manispaa ya Temeke Bibi Tatu alisema pamoja Na kuwepo kwa mafanikio katika kaya masikini sana,bado kumekuwepo  na kaya masikini ambazo hazikuandikishwa kwenye mpango kwasababu mbalimbali,pia kuna ushindani mkubwa wa masoko pamoja na kutokujua  kusoma na kuandika kwa baadhi ya walengwa.

Akihitimisha alisema”TASAF awamu ya tatu imeendelea kufanikiwa kutokana na ushirikiano wa kiutendaji katika ngazi mbalimbali za utekelezaji kuanzia Taifa hadi ngazi ya Jamii,na kuwashukuru TASAF makao makuu,ofisi ya  Mkurugenzi wa Manispaa ya Temeke,viongozi wa kata,viongozi wa dini na vyama mbalimbali na wananchi kwa ujumla.